› 選擇地區
三藩市
紐約
洛杉磯
其他美國地區
香港 台灣 北美
 
2013年03月13日

求驗客手記:今季聯賽踢足2,610分鐘
鐵人謝4好英!

我求大俠喺度向利物浦隊長謝拉特致敬!經歷多次傷患,去到32歲,但謝拉特體能仲勁過後生嗰陣,今季踢足英超每一分鐘,可以話係鐵人謝4,真係連Iron Man都唔夠佢嚟!剩番9場聯賽,謝拉特唔單止向賽季全勤嘅個人目標進發,仲話要幫紅軍打入前5,夠晒英。
謝拉特近幾季都受到鼠蹊同足踝傷患困擾,好似上季聯賽就只得12次正選;唔少人都以為「神奇隊長」係時候退落嚟。不過佢又點會向傷患認輸?謝拉特今季變身鐵人,踢足29場英超,而且場場都冇被換走,共上陣2,610分鐘,係唯一一名保持全勤嘅中前場球員;而且攻入8球,另有9次助攻,同朗尼、桑馬達等並列助攻榜首。

相關新聞:又加票價 紅迷:侮辱我哋

轉打防中襟踢啲

謝拉特咁「弗」,除咗要讚吓佢愛惜自己身體外,仲要歸功領隊羅渣士知人善用。羅帥睇中謝拉特經驗豐富,今季用佢打防中,去控制節奏,做deep-lying playmaker。呢個位勝在唔使成日帶波殺上去同對方後衞硬碰硬,而防守嗰陣又有盧卡斯等後輩幫手做攔截;所以謝拉特自然冇咁易受傷,襟踢啲。不過,從另一個角度睇,謝拉特全勤亦代表紅軍欠缺防中人才;祖阿倫同佐敦軒達臣都擔唔起大旗,盧卡斯季初又重傷唞咗半季。
上場對熱刺射入12碼,謝拉特幫利物浦贏熱刺3:2,升番上第6位。呢位隊長話嚟緊9場要交出完美表現,目標係下季歐洲賽資格,「利物浦絕對唔係屬於第7名、第8名或者第9名,我想每年都有得踢歐洲賽。希望𠵱家發力都未遲,我哋一定要喺季尾踢出完美嘅表現。前5位係目標,我哋會先做好自己。」
撇除門將,英超史上有40個球員可以踢足全季嘅每分鐘,利物浦之前有希比亞、加歷查同史卡迪爾。至於喺今季英超拍得住謝拉特嘅,就只有阿士東維拉後衞馬菲路頓,兩人係今季上陣時間最多嘅非門將球員。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載