› 選擇地區
三藩市
紐約
洛杉磯
其他美國地區
香港 台灣 北美
 
2013年04月14日

體育開講:
「如果呢球入咗呢……」 - 馬啟仁

有人話足球世界食古不化,都唔係吖,好似門線科技( goal-line technology)講咗冇耐,下年英超就即刻話會用嘞,唔知算唔算係曾經受害者呀朗尼就即時有反應,話好歡迎呢項新科技,仲話日後球場應該會少咗好多問題球咁話,嘩咁官腔,令人懷疑究竟朗尼呢段facebook留言係咪佢自己寫。
反而呀里奧費迪南響自己個page就講得有型好多,「有咗呢項GLT,咁第日傳媒/酒吧/球迷之間咪少咗好多拗撬?」係喎,波冇得拗就冇咁好玩啦,不過里奧又唔使替球迷愁,皆因呢項新科技未正式放落球場,大家已經開始發表偉論:「嘥錢,一年有幾多球問題球呀!」「嘥氣,電腦都可以錯㗎嘛!」「嘥料,咁球證嘅權威就會被剝削啦!」最後呢個留言應該係來自一位球證,亦有球迷舉一反三:「應該換個電腦球證啦索性。」「諗吓點搞搞個啲場場出現嘅插水、紅牌仲實用啦。」

至於我哋香港球迷,呢個星期就感同身受,經過旺角場一場腰斬嘅亞協賽事之後,大家一致認為球場應該加番一部測謊機,睇吓啲聲稱受傷嘅球員係咪真係頂唔住,咦,咁其實係應該整部測傷機先真喎。抑或係要研究吓那些幾十年一成不變嘅球例呢?我又真係好想知道究竟當年寫球例嘅前輩係點樣決定,當一隊波得番6個人就要腰斬呢?係,表面睇嚟係好似人多打人少,但係歷史以來太多賽果係話畀你知,打少個冇話輸硬,打少兩個,甚至3個偷雞入到波都不時發生啦,何況我哋睇開葉問嘅,都崇尚一個打十個嘅英雄場面。
講到變,其實歐洲足協係比較變得快嘅組織,淨係睇歐聯晉級由以前一早抽晒線路入決賽,到𠵱家逐round同你再抽過,你話刺激咗幾多呢,雖然又要孭多咗啲內定陰謀上身,但係西班牙同德國唔使響4強就自己人打自己人,想像空間都確實多番啲。4強之中實力「最弱」嘅多蒙特,竟然成為咗好多球迷心目中嘅奪標心水,原因不外乎兩個,一係貪新鮮,老牌勁旅實在有點悶;二係鋤強扶弱心態,向強權說聲No。
keyman
now TV主持
mailto:keymansoho@gmail.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載