› 選擇地區
三藩市
紐約
洛杉磯
其他美國地區
香港 台灣 北美
 
2013年05月18日

趣趣地:
為慈善爆炸頭變藍戰士

𠵱家一到季尾,間間球會都搞周年頒獎晚會,搞到好似奧斯卡一樣隆重,球員亦好識做,當正自己荷里活巨星咁,走上紅地氈任人影,有啲球員仲悉心打扮,甚至轉個look畀大家新鮮感。
好似前晚愛華頓搞嘅頒獎晚會,費蘭尼就搶晒鏡;呢位比利時國腳個爆炸頭本來就夠「爆」,但佢嗰晚再將頭髮染成銀色,而喺晚宴畀啲藍光打落個頭度,成個頭就變咗紫藍色超sharp醒。其實費蘭尼將個頭染成銀色,係為球會做善事,幫官方慈善組織嗰晚籌得25,000鎊(逾29萬港元)。不過,佢話呢個「銀頭」就此一晚,之後會染番黑,球迷梗係想佢留埋到聽日對車仔場煞科戰。

莫耶斯臨別獲獎表揚

雖然最出位,但費蘭尼喺爭獎方面就輸晒畀隊友巴尼斯,呢位拖肥糖左閘連續兩年贏得球會嘅足球先生同球員先生兩大個人獎項,而仲未落實今夏退唔退休嘅菲臘尼維利,就獲頒發傑出貢獻獎。至於晚會最感動一幕,就係下年即將轉教曼聯嘅莫耶斯,入場時就獲全場起立熱烈鼓掌致敬,令莫帥當場亦眼泛淚光,而佢喺晚宴上亦奪得主席頒發嘅「藍血人獎」,感謝佢喺度執教咗11年咁耐。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載