› 選擇地區
三藩市
紐約
洛杉磯
其他美國地區
香港 台灣 北美
 
2013年07月08日

求驗客手記:畀法拉利挑機
巴神想揸坦克還拖

「巴神」想轉揸坦克!意大利前鋒巴洛迪利,係就係好有錢,好多靚車都玩過,不過公路上遇到挑釁,巴神竟然唔選擇鍊番轉,反而話想轉揸坦克,鏟平挑釁佢嘅對手。
巴神幫意大利踢完洲際國家盃,呢排返到米蘭,同祖雲達斯中場派路拍緊意大利收費電視台廣告;唔知係唔係NG多得滯,搞到巴神有啲燥,日前佢就係個人twitter度講:「當我揸揸吓車時,有架法拉利係咁閃我,行X開啦!」

twitter上載坦克輾車

巴神越講越火滾,仲咁講:「或者我應該轉買坦克車」,之後上載埋一張坦克車輾爛私架車嘅相。巴神冇講到佢當時揸咩車,佢老哥之前效力曼城,揸架迷彩賓利就全城搶鏡,轉投AC米蘭冇耐,又話佢同女友芬妮分手(不過據講佢哋𠵱家已經冇嘢,仲訂埋婚),自己仲買咗架法拉利嚟安慰自己。
以巴神嘅身家,當時都唔係揸啲咩平車,有法拉利開行高燈閃佢,撩佢鬥番轉又有咩出奇?奇就奇在巴神好似收火,俾着以前,由米蘭鬥車鬥到羅馬又點會驚,甚至落車打法拉利司機都唔奇,不過今次只係做鍵盤戰士,上網同接近100萬嘅粉絲分享,車又鬥唔到,似乎有失霸氣喎!
巴神現實生活做唔到車神,其實以佢之前拍廣告嘅經驗,落場踢波又多浮誇動作同表情,不如真係去客串賽車電影系列《狂野時速》啦,話說呢齣戲嘅第6集已經有坦克車壓爛私家車嘅劇情,巴神不如客串拍第7集,揸坦克車橫行霸道啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載