› 選擇地區
三藩市
紐約
洛杉磯
其他美國地區
香港 台灣 北美
 
2013年07月20日

體壇拾趣:PP𠱁足KG兩粒鍾
星級網隊現身

塞爾特人3子(左起)皮雅斯、加尼特及泰利,今夏齊齊轉投網隊,令網隊更具星味。美聯社

「NBA曼城」大晒冷!今季總薪酬超過1億美金(約8億港元)嘅網隊,周四正式舉行記者會,歡迎3位從塞爾特人交易返嚟嘅新兵:加尼特(KG)、皮雅斯(PP)同泰利,皮雅斯仲自爆,足足花咗兩個鐘,先說服加尼特加盟,連埋卡里倫高呢位新兵,網隊今季陣容就有6位明星級球員,觀眾入場睇星都夠回本!

網隊周四開呢個晒冷大會,加尼特等3人都舉起新波衫,PP同泰利都繼續着之前着慣嘅34號同31號,KG就冇揀到木狼時期嘅21號,或者塞爾特人時期嘅5號,反而選擇2號球衣,因為佢想紀念亡友施利(Malik Sealy)。

皮雅斯:傑特叫我搵埋KG

其實37歲嘅KG都諗過今夏退休,係PP叫佢一齊過網隊。PP表示:「綠軍今夏重建,教練李華士轉到快艇,KG原本都好大機會去快艇,不過交易最後告吹。之後傑特(網隊教練)同我講,話有興趣簽我,仲叫我搵埋KG一齊去。我打畀KG,大家都傾咗成兩粒鐘,當KG知道交易後,網隊內線仲keep到B盧比斯,就好興奮答應交易。」KG回應退休傳聞,講到如果唔係PP,根本就唔會轉會,今次喺一個熟悉環境比賽,簡直好似新挑戰;兩人由綠軍過檔網隊,關係梗係好,記者會上,35歲嘅PP仲幫KG抹汗,唔知仲以為佢哋斷背㖭。

6將曾入選明星隊

網隊成軍後,今季總薪酬達1.02億美元,冠絕聯盟,拋離次席嘅熱火約1,700萬美元,不過網隊班主普豪洛夫大把錢,可能要交8,000萬美金豪華稅都冇所謂,最緊要拎到總冠軍。普豪洛夫仲講明,如果2015年前拎到總冠軍,佢先會去結婚,𠵱家就全力協助網隊封王,搵女友都冇時間。連埋迪朗、祖莊遜等,網隊全隊有6名入選過明星賽嘅球員(見附表),總次數更加達36次。觀眾抱睇星心態已經夠打爆網隊主場館,新季季票銷售額已經超過300萬美金,季票都差唔多賣晒,9月開始出售單場個人及團體飛,肯定出現撲飛潮。

倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第二集足本放送中!速上:
http://hk.apple.nextmedia.com/livestream/channel/talk24

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載