› 選擇地區
三藩市
紐約
洛杉磯
其他美國地區
香港 台灣 北美
 
2013年07月20日

賽馬學堂:試閘睇到真假勇馬

香港地方細,賽馬訓練模式,局限在馬場範圍內進行,除日常慢試、快跳外,試閘是其中一個重要環節。
香港大部分練馬師,均常派馬試閘,有無作用可想而知,佢哋唔係傻,若果無用,點會肯安排馬匹試大閘,所以唔好話試閘無用,或者試閘呃人。

馬房手法知戰意

A:試閘作用何在,點解一定要試閘,又唔見英、愛、法三地練馬師,會安排馬匹試閘?
健:英、愛、法訓練方式,與香港唔同,香港賽事以中短途為主,試大閘某程度上,有助提升馬匹速度,角逐興趣;還有對一些未夠跑頭,甚至未曾出賽的馬,學吓嘢,引導牠們習慣競賽模式。
健:練馬師透過試閘,觀察走勢之餘,也能由騎師試完匯報,增加了解,舊馬知狀態,新馬知不足,對之後點樣操,起到重要作用。
A:點解有啲馬,要常試閘,有啲就較少試閘呢?
健:每匹馬都有特性,有啲經常要試過大閘,出賽才有好表現,當然亦有馬體質較弱,不宜常參加運動量較大的試閘操練。
A:點解有些馬房,如胡森、霍利時、告達理,比其他練馬師,較少安排旗下馬試大閘呢?
健:數字上,上述三個倉,確較其他馬房少派馬試大閘,他們的試閘馬,多數是未出賽新馬,或自購馬,因為要硬性試閘取得及格,才可報名出賽,所以都會有馬試,不過,凡事都有例外,像胡森、告達理,偶而會安排三數駒,頻密試閘,好似胡森,上季「經典皇牌」與「左右逢源」,經常都有試閘,當然,試完唔係實贏,但參加次數,明顯較其他廐侶多,睇番兩駒上季成績,便一清二楚!
健:至於告達理,最深刻是「香港神駒」,這馬喺香港三年,只試過兩次大閘,我唔講,可能未必發覺,更誇張係,兩次大閘相距足足兩年,2011年11月試第一次閘,2013年1月19日,告達理突然安排試閘,仲要長途拔踄,走去跑馬地試閘,「香港神駒」贏完此個閘,大告安排2月20日久休復出,跑谷草1200爆冷贏馬,信唔信無部署呀!

比較同試馬實力

A:聽你講咗啲成功例子,咁點解又有唔少馬,試閘見好,出賽會走樣呢?
健:有啲馬試閘常見好,尤其是短途快馬,有速度,試閘用出七、八成都夠贏,試贏表面又搶鏡,自不然會引人注意;我哋要留意,該課閘有乜馬同試,係咪短途馬與中距離,甚至長途馬同試,又或者,短途舊馬與一堆新馬試,仲要注意同試馬姿態,或當時狀態水準!
A:可舉吓實例嗎?
健:告達理的「心理學家」,徐雨石的「偉寶之星」,此兩駒試閘多數贏,純粹靠速度及本身重口,有馬拍住試更難留得住,再加上與牠們的同試馬,大多唔會同佢鬥傻。又有啲馬,真係唔適宜頻試閘,因試閘點都比日常快試用力,試閘用咗力,到出賽體力恢復唔到。有時留意吓《蘋果》賽績版所列的馬匹、馬房試閘數據,都會有幫助。

唔pass 唔准出賽

● 睇賽後報告,經常都有馬被指定要試閘及格,才准報名出賽,包括逢周二、五或六的大閘,以及每逢周一、四草地1800米起步點的彈草閘(又叫彈細閘),在司閘員在場下,進行試閘評核,獲得及格方可再報名跑。
● 試閘主要測試馬匹,入閘、出閘外,尚有配備考閘,當中包括試各種眼罩,以及鼻箍、面箍、綁脷帶及口銜鐵的效用。

逢周六至周一刊登

倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第二集足本放送中!速上:
http://hk.apple.nextmedia.com/livestream/channel/talk24

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載