› 選擇地區
三藩市
紐約
洛杉磯
其他美國地區
香港 台灣 北美
 
2013年07月30日

Sports Network:
黑帝出巡

「紅」運當頭

F1平治車手「黑帝」咸姆頓,周日喺匈牙利站,奪得加盟平治之後首場勝仗;呢排坐住架私人專機四圍走嘅咸仔,賽後話想將勝利送畀前女友妮歌。又開心又傷感,拒絕被叫做花花公子嘅咸仔,果然係性情中人。
已經連續3站排頭位出賽嘅黑帝,今站由頭帶到尾,最後領先蓮花嘅拉高倫成10.9秒奪冠;加盟咗平治足足已成10站比賽,今次勝利真係得來不易。原來佢今站賽事個心始終諗住一個人,就係早前分手嘅前度女友妮歌。咸仔話:「成場比賽我都諗起一個對我嚟講好特別嘅女人,我一心想將勝利奉獻畀佢。」佢仲話呢一站比賽,因為一啲私人理由而變得好唔一樣,睇嚟都係同妮歌有關。

將勝利獻給前度

回復單身嘅咸仔,呢排坐住架私人飛機四圍出巡;周一離開匈牙利都係坐呢架紅色專機,仲有一大班車迷喺機場送行,排場認真勁!28歲嘅黑帝買咗架飛機之後真係物盡其用,淨係呢兩個星期就已經飛咗成1.4萬英哩,去咗8個國家!去倫敦睇Jay-Z,之後又去洛杉磯錄音玩音樂,搞到外界用花花公子嚟稱呼咸仔。當事人聽到當然唔高興,仲出聲反擊㖭!
「我認為花花公子,係嗰啲成日去蒲、飲酒、亂發生關係同亂使錢嘅人。呢啲人多數都唔係咩好人。」咸仔首先為花花公子定義。之後佢再講:「我好少去蒲,又唔多飲酒,就因為一架飛機就要俾人話?我都係想飛得舒服啲先出錢喳!」你仲咁掛住妮歌,大家會明㗎啦。

【動主播召喚 敢你就來】
立即報名: http://anchor.nextmedia.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載