› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

求驗客手記:拿玻里新兵腳頭好 賓帥風騷

拿玻里禮拜一晚主場友賽加拉塔沙雷,教練賓尼迪斯賽前晒新兵,希古恩同連拿正式同球迷見面。雖然呢兩大猛將都係做觀眾,但拿玻里靠彭迪夫等舊將建功,以3:1輕取有杜奧巴嘅加拉塔沙雷。

希古恩做人氣王

拿玻里今夏搵到條大水魚,將前鋒卡雲尼賣咗去巴黎聖日耳門,收番6,400萬歐元(約6.6億港元),所以新教練賓尼迪斯水頭充足,即刻大搞西班牙化。佢向皇家馬德里啲冗員埋手,加埋用咗5,800萬歐元簽咗希古恩、荷西卡利祖同艾比奧爾;賓帥仲順便由利物浦挖埋舊將連拿返嚟,借用一年。
賓帥喺禮拜一場友賽前,帶埋希古恩、連拿出嚟,同拿玻里球迷見面。可能同名宿馬勒當拿有關,球迷非常鍾意同樣嚟自阿根廷嘅希古恩;當佢着住拿玻里波衫入場時,全場哄動,氣勢就好似前日尹佩斯代表曼聯後備入場鬥傑志咁勁!賓尼迪斯呢日着間條恤衫配牛仔褲,便裝一度,春風滿面,睇落好似後生咗咁!

周末入「廠」爭阿聯酋盃

由於初嚟埗到,仲有啲手續未搞掂,希古恩同連拿冇份落場踢,坐喺場邊做觀眾;幾名主要新兵中,有荷西卡利祖同巴西門將拉菲爾卡比爾打正選。射手彭迪夫4分鐘建功,幫拿玻里半場領先1:0。雖然加拉塔沙雷換邊後一度追平,但辛尼加同恩斯治尼各入一球,拿玻里最後輕輕鬆鬆贏3:1。嚟緊星期六,拿玻里將會去參加阿仙奴主辦嘅阿聯酋盃。
另外,意甲賽會周一公佈來季賽程,其中第7周最精采,有國際米蘭對羅馬,同埋祖雲達斯對AC米蘭兩場大戰,至於首循環嘅米蘭打吡就要等到第17周。不過,我求大俠向香港啲電視台收過風,未聽到有邊間想買意甲轉播權,所以香港球迷今季應該睇唔到意甲嘅電視直播。想睇希古恩踢波嘅英姿或者賓帥督師嘅雄風的話,可能就要等歐聯嘞!

杜汶澤、彭浩翔初會蔡瀾、黎智英!仲未睇?
第三集《亂噏24》足本放送中,即上:
http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載