› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

體壇拾趣:贏口碑兼換紅魔衫
傑志輸波照like

傑志中場林嘉緯(右)同曾錦濤展示前晚換到嘅曼聯隊長艾拉球衣。曾雁平攝

「港版巴塞」傑志前晚響香港大「爛」場對英超勁旅曼聯,結果合演咗場有7個高質素入波嘅表演賽,相信球迷應該收貨,而賽後唔少球迷讚傑志踢得好,又有隊形,總領隊伍健嘅fb賽後收到唔少like,至於中場林嘉緯以世界波射破紅魔大門,當然威威,可惜換唔到卡域克件波衫,變咗有少少遺憾。
雖然紅魔有尹佩斯、里奧費迪南同菲爾鍾斯等主力後備,不過,響艾拉同湯卡華利帶領下,冇因為場爛而hea踢,7個入波又幾靚;而傑志球員賽後就忙於響更衣室門口捉住魔兵換波衫同合照,其中林柱機最勁,一個人換到連迪加特同韋費特沙夏兩個人件衫,另外,踢過英超富咸嘅中堅列文同里奧亦傾咗好耐。

球迷讚叻過少林寺

唔少球迷賽後即刻響傑志班主伍健fb留言勁讚,仲話相信會有唔少球迷睇完呢場波而鍾意傑志;亦有球迷拉埋上個禮拜響巴克萊亞洲賽輸畀曼城同熱刺嘅南華嚟講,話論兩隊表現,少林寺表現就失色好多。
傑志原先希望場波可以幫賽馬會傑志足球中心籌多啲錢,可惜慈善晚宴善款冇預期咁多,但完全唔影響伍生心情,佢笑笑口話,多謝球迷支持同捧場,仲有響fb畀球隊嘅好多個like,所以辛苦都值得,而今次有好表現可以話係過去幾年努力建立打法嘅成果,不過,球隊唔會因為今次有好口碑而停落嚟,嚟緊目標係亞協盃4強,甚至決賽。

嘉緯換唔到卡域克波衫

至於傑志噚日已經復操,下月中就會去泰國集訓,為月尾展開嘅港甲做最後準備,而林嘉緯話,球員生涯可以兩戰曼聯(上次係8年前,後備上陣5分鐘,今仗仲要福至心靈入埋波),真係冇乜苛求,只係賽前同自己好欣賞嘅曼聯中場卡域克講好交換波衫,點知最後都換唔到,亦冇機會同曼聯球員影相留念,確實有少少唔開心。

【動主播召喚 敢你就來】
立即報名: http://anchor.nextmedia.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載