› 選擇地區
三藩市
紐約
洛杉磯
其他美國地區
香港 台灣 北美
 
2013年08月10日

求驗客手記:
歐聯附對費倫巴治
阿仙奴惡啃!

喺阿仙奴領隊雲格心目中,英超前4嘅歐聯席位,仲緊要過盃賽冠軍,歐洲足協周五就舉行歐聯附加賽抽籤,兵工廠要對住擁有古積特、尤保等前英超兵嘅土超球隊費倫巴治,絕對算係下下籤。
阿仙奴上季英超臨尾驚險壓過熱刺拎第4,雲格開心到開香檳,不過唔好開心住,因為要過埋附加賽至可以躋身分組賽。雖然阿仙奴喺聯賽組有種籽制,理論上抽到較弱對手,不過今次對費倫巴治唔係易啃;費倫巴治係上季土超亞軍,陣中都有唔少前英超兵,好似前利物浦射手古積特,愛華頓中堅尤保,紐卡素中場安利仲以隊長身份領軍。土耳其球隊一向主場勁,費倫巴治上季17場土超主場贏12場,佢哋仲要首回合先主場,阿仙奴千祈唔好掉以輕心。

周四開放操練玩親民

阿仙奴趁抽籤前,大軍周四就搞個開放操練,喺阿聯酋球場練波,等一眾阿仙奴會員近距離接觸偶像;禾確特就大玩親民,同一班戴住自己照片整成面具嘅球迷合照。對於阿仙奴同利物浦前鋒蘇亞雷斯沒完沒了嘅轉會新聞,禾仔就好大口氣咁講:「如果阿蘇加盟,對球隊一定係好消息,但如果球隊維持𠵱家人腳,我哋仍然係一支優秀嘅球隊。」

AC鬥燕豪芬或缺巴神

另外,意甲傳統強隊AC米蘭,上季只取得第3位,今屆要打附加賽先知可唔可以入分組賽;AC嘅對手係荷甲嘅燕豪芬(PSV),計實力,AC唔叫超對手好多,PSV更有朴智星回巢,好衰唔衰AC嘅前鋒「巴神」巴洛迪利,對洛杉磯銀河嘅國際冠軍盃比賽時,整傷咗右小腿肌肉,預計缺陣首回合比賽,AC要求神拜佛巴神次回合喺主場復出,唔係陣間出唔到線,就損失數以千萬歐元計。
另外,歐霸盃周五亦進行附加賽抽籤,英超雙雄熱刺及史雲斯,分戰第比利斯戴拿模及比杜路爾;而降至英冠嘅英足盃冠軍韋根,則直接打入分組賽。

講電影變講國情,阿澤彭導最後一星期做嘉賓,
未睇?即上《亂噏24》重溫!
http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載