› 選擇地區
三藩市
紐約
洛杉磯
其他美國地區
香港 台灣 北美
 
2013年08月13日

求驗客手記:艾格喊走  阿蘇拒sor
羅渣士好頭痕

新一季英超喺周末就開鑼,不過今夏轉會市場4大煩友加里夫巴利、朗尼、蘇亞雷斯同埋大衛雷斯,到𠵱家一個都冇郁過。利物浦死都唔肯賣阿蘇,領隊羅渣士仲話要佢向球隊道歉先會用番佢;之但係據講阿蘇睬你都儍,唔會講sorry堅持要走人。屋漏兼逢夜雨,阿蘇前途未明,紅軍後防主力丹尼爾艾格都表示有離意,真係越搞越麻煩。

阿蘇不道歉一心過「廠」

阿蘇之前公開炮轟利物浦冇口齒,上季攞唔到歐聯參賽席位都冇守信用放佢走。不過紅軍方面一直企硬,仲指雙方合約根本冇贖身費條款,所以阿仙奴就算開價4,000萬鎊加多1鎊都唔肯放人,領隊羅渣士亦要求阿蘇就不忠誠言論道歉。
據報阿蘇嘅反應非常唔高興,認為佢係被羅渣士背叛,打死都唔會出嚟公開道歉,依然堅持要走人過檔去一家有歐聯踢嘅球會,即係阿仙奴啦,睇嚟呢單嘢都會一直拖拖拉拉到9月初球會轉會市場關閉。紅軍雖然一直堅持唔肯賣阿蘇,但可能都知佢都係養唔熟,羅渣士除咗公開大讚今年1月加盟嘅史杜列治,認為佢可以喺鋒線孭飛之外,據報球會亦打算同拿玻里拗手瓜,爭簽祖雲達斯嘅前鋒馬特尼。

傳艾格1.8億入「塞」

除咗阿蘇,另一位利物浦主力最近亦都成為咗其他豪門球會嘅目標;西甲巴塞隆拿之前斟車路士中堅大衛雷斯唔成功,已經將目標轉喺紅軍嘅丹尼爾艾格身上。雖然紅軍否認收到巴塞對艾格嘅正式斟介,但有傳巴塞已經準備好開價1,500萬鎊(約1.8億港元)去撬呢位球隊副隊長。而艾格嘅經理人史堤芬遜亦有同球會唔多同口徑嘅講法,或多或少暗示想走人:「據我所知巴塞已經開價收購,但畀利物浦拒絕咗。艾格同紅軍仲有3年約,要佢走人當然要先過利物浦呢關,開出一個佢哋肯接受嘅轉會費銀碼,轉會先可以成事。」咁講法即係呼籲巴塞加碼再斟艾格咋喎。
利物浦喺新一季英超打頭陣主場對史篤城,如果阿蘇唔肯踢,艾格又要走嘅話,對紅軍肯定有大影響,要爭前4真係唔多樂觀。

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載