蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月18日
馬上成為壹會員

求驗客手記:兩球助攻畀利記
舒維爾無間道

如果一個球員入咗1球同造出3個助攻,係咪代表佢隊波入咗4球?舒維爾會答:代表場波踢成2:2!究竟佢係利物浦球員,定係史雲斯嘅人?
舒維爾就好似《無間道》入面嘅劉健明,喺星期一晚英超,佢好似分唔清自己嘅身份,既幫史雲斯入波,又助攻畀利物浦,結果參與晒4個入波,為新東家史雲斯主場以2:2逼和佢嘅前球會利物浦。
舒維爾喺兩分鐘就為史雲斯開紀錄。不過之後佢就迷失咗自己身份,喺4分鐘送出致命直線,一刀插入自己禁區,史雲斯嘅隊友唔會意,但史杜列治就好有默契,接應舒維爾嘅「助攻」,幫利物浦追平1:1。史杜列治4場英超入4球,佢話呢吓走位純粹靠估,「我都係估佢回傳咋。今次係我好彩,佢真係傳去嗰度,咁我先入到波。」

1入球3助攻=2:2

舒維爾可能仲未發覺自己已經轉咗會,或者以為搭咗時光機返回上季,佢繼續助攻畀利物浦。36分鐘,佢喺中圈將個波傳咗畀由車路士借到利物浦嘅域陀摩西斯,後者一路殺入禁區頂抽射入網,幫利物浦半場反超前2:1。望住球場上比分牌,舒維爾雙手抱住佢個光頭,非常失望。
好好彩,舒維爾有半場時間去彌補自己嘅過錯!64分鐘,佢頭槌助攻畀米捷破網,最終史雲斯主場以2:2逼和利物浦,紅軍就繼續排榜首。至於舒維爾就成為呢套「球壇無間道」嘅主角,交出1個入波同3個助攻,參與晒4個入波。

「想即刻搵窿捐」

無啦啦做咗臥底,送咗兩次助攻畀前球會,舒維爾賽後真係冇面見史雲斯球迷,佢話:「係好慘痛嘅感覺,我唔想再有其他球員經歷到呢啲事;你會想即刻搵窿捐,去個全世界都見唔到你嘅地方。我真係好想同球迷道歉,因為我嘅兩次犯錯,令到利物浦賽和我哋。」史雲斯領隊米高勞特立就冇怪佢,仲話挫折會令舒維爾變得更強。

熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載