蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月30日
馬上成為壹會員

求驗客手記:
巴利輸波 美斯傷出
左腳王遭殃

加里夫巴利隻「黃金左腳」貴絕全球,上季幫熱刺拎唔少救命分,點知佢上周六首度喺皇馬主場出師,就救唔到銀河艦隊,打吡戰竟然失威畀馬德里體育會。同日「左腳球王」美斯雖然幫巴塞取得7連勝,但就整傷大腿肌肉,會方公佈佢要休息2至3星期,唔使預佢周二對些路迪嘅歐聯分組賽。
皇馬上周六主場出擊,同馬體會合演首都打吡,雙方近23次聯賽交鋒,皇馬取得16勝7和,教練安察洛堤(肥安)心諗夠殺,1億歐元轉會費嘅巴利始終有傷患纏身,今仗只做後備。點知皇馬11分鐘解圍失誤,俾客軍截到順勢打反擊,近期弗到漏嘅前鋒迪亞高哥斯達單刀建功,幫客軍射成1:0。

馬體會開季7連勝

肥安下半場即刻派巴利上陣,巴利亦首度喺巴拿比奴球場落場,仲司職右翼鋒;其實擅長左腳嘅巴利,上季喺熱刺都不時串演右翼,推埋大位勁射呢招,仲幫球隊拎到唔少救命3分,但今次如意算盤打唔響,兩次射門1次中目標,但就畀馬體會門將泰拔高圖爾斯救出,加上C朗、艾華路莫拉達等連番失機,皇馬未能追和,以0:1見負,今季不敗身被打破,亦都係1999年以嚟,首次主場輸畀馬體會。皇馬教練出名難撈,賽後主隊球迷發出大量噓聲,肥安就話:「呢兩場我哋都打得唔好,唔夠專注,一定要改善,𠵱家差巴塞同馬體會5分,好彩聯賽仲有好長嘅路。」

馬體會開季就威水,殺低皇馬取得7連勝,同佢一齊咁威,就有巴塞;巴塞上周六作客艾美利亞,由美斯同艾迪安奴各建一功,以2:0贏波,創球會紀錄開季7連勝。不過「左腳球王」美斯踢到28分鐘,因為左腳大腿肌肉受傷退下火線,由沙維入替。球會就係官方網頁表示,隊醫周日為美斯作詳細檢查,確定需缺陣2至3星期,周二作客些路迪嘅歐聯就肯定缺陣。美斯今季已經喺各項比賽幫巴塞入11球,睇嚟巴西前鋒尼馬要孭重飛嘞。

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載