› 選擇地區
三藩市
紐約
洛杉磯
其他美國地區
香港 台灣 北美
 
2013年10月06日

開波Kick off :
女球迷同學會 - 馬啟仁

女球迷抬頭,車車(左三)和依雯(中)都是足球節目主持人。圖片由作者提供

多得WhatsApp,還有WeChat,斷了線一段日子的舊同學舊朋友都聯絡上了,還因為有group chat,大夥兒可以約番個懷舊聚會的機會大咗好多。自己就身歷其境的參與咗大專到預科到中學嘅聚會,只差小學雞那一班,唔知阿孖辮妹同高佬強佢哋家陣變成點呢?而工作上近排亦多咗機會大懷舊,多得《求分》呢個節目,原本節目係走在潮流尖端,嬉笑怒罵寓遊戲於睇波,但因為每集都有幾位足球朋友上嚟一齊玩,結果呢就因緣際會同各位舊雨新知走埋一堆,懷舊吹波嘞。

愛恨分明 絕不騎牆

呢班同學會成員,有趣現象係竟然唔少女流之輩。原來唔覺唔覺,以往足球壇嘅少數族裔,家陣其實已經人才濟濟,而對話內容亦由以往非常膚淺的一場波幾多人踢呀,到越位之謎大解構之流,演變成韋比其實冇偏幫及哨牙蘇拍史杜列治好過當年奧雲夾科拿等等,女仔睇波潮流,睇嚟終於抬頭!
就正如女子足球,技術可能拍唔上男仔波,但係佢哋唔貪功肯畀波嘅teamwork係好明顯嘅;女仔講波呢,雖然未必真係好深入(男仔何嘗唔膚淺),但有樣嘢佢哋好出色嘅,就係愛恨分明得很,愛就愛,恨就恨,冇話中間路線,冇話臨場發揮咁騎牆;所以同女仔傾波,除非佢係偽球迷,否則必定火花四濺。
就以前晚上節目嘅Kelena同阿Kit之所以咁啱傾,當然係因為大家都係利記fans,唔alone咁一齊捱咗十幾年冤屈,今年睇嚟可以一吐烏氣,所以講嘢係大聲咗;而不嬲講嘢都大聲嘅車車,其實又唔係撐車仔喎,反而係捧曼城,你真係唔好嘗試同佢拗,冇道理時車車都已經氣吞天下,家陣熟波到暈,得罪佢愛隊恐怕連你都吞埋。
相比之下依雯波齡可能最深,但提起愛隊曼聯有啲陰聲細氣,同埋仲係成日捉住C朗呢啲當年情,唔通紅魔家陣真係走晒樣,靚女都唔吼?至於LuLu就有點尷尬,因為大埔BB形象太深,所以佢話鍾意曼城就冇乜說服力,加上佢曾經同我講:「其實我都可以試吓支持韋斯咸嘅。」令我相信呢位細路女,可能未曾明白愛情是何物。
咁多個之中Icy應該最幸福,因為佢選擇咗與男友同一陣線支持阿仙奴,咁就happy啦𠵱家,至於Scarlett就最冇誠意,佢話支持曼聯,而原因竟然係,好多麻雀腳着曼聯波衫喎!
KEYMAN
now TV主持

足本收睇《亂噏24》x 卓韻芝;緊接歡迎「宇宙最強」甄子丹!
周一至周五《亂噏24》預埋你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載