› 選擇地區
三藩市
紐約
洛杉磯
其他美國地區
香港 台灣 北美
 
2013年10月07日

求驗客手記:再做絕殺王
C朗狂舞派

為咗贏波,你可以去到幾盡?基斯坦奴朗拿度(C朗)補時4分鐘怒射破網,繼續做絕殺王,幫皇家馬德里上周六作客反勝利雲特3:2。入波後,C朗仲興奮到除衫,騷肌肉,兼走到去場邊跳舞慶祝。

領皇馬3:2反勝利雲特

皇馬呢場踢得麻麻地,被利雲特嘅巴巴迪亞華拉先開紀錄,雖然沙治奧拉莫斯及後追平,但艾沙亞喺86分鐘幫利雲特入多球,搞到皇馬落後1:2。雖然得番幾分鐘,都夠皇馬反勝。艾華路莫拉達喺90分鐘先救球隊一命,追成2:2,但講到做英雄,始終都係C朗。踢到93分鐘有多,C朗喺禁區邊勁射,省到對方球員再中柱彈入,絕殺利雲特,幫皇馬驚濤駭浪下反勝3:2。
C朗入完波後high到爆,即刻除咗件波衫,大騷肌肉,就算攞黃牌都冇所謂。雖然鏡頭冇交代到C朗除完衫做啲咩,但場邊攝影師就影到,佢半裸咁走去場邊跳舞。齋睇相,我求大俠都唔知C朗跳啲咩;但英國《每日郵報》就話佢嘅舞步好似某個愛爾蘭嘅舞蹈員喎,計我話,C朗都係興奮得滯,忍唔住狂舞幾步啫,應該唔係扮任何人。
C朗場場入波就唔係咩大新聞,但我求大俠發現,佢近4球聯賽入波,有3球都喺90分鐘後先入;包括9月底作客艾爾切,佢補時入波幫皇馬2:1絕殺。𠵱家C朗真係越近完場越恐怖!
除咗C朗,呢場前鋒賓施馬都係焦點,因為佢累積562分鐘西甲入球荒,呢場踢到78分鐘就被換走;反而小將莫拉達就有入波。教練安察洛堤暗示可能棄用賓施馬,「有呢個可能性。雖然莫拉達冇賓施馬嘅經驗,但佢有技術同熱情,係球隊重要一員。」

馬體會、巴塞8連勝

皇馬嘅宿敵巴塞隆拿就贏得輕鬆,雖然美斯受傷,但有阿歷斯山齊士梅開二度,加埋尼馬同沙維各入一球,助巴塞主場大炒華拉度列4:1。尼馬今場有入波又有助攻,當然搶鏡,但中場桑治102次傳球全部畀到隊友,成功率百分百!
周日西甲早場,馬德里體育會憑迪亞高哥斯達梅開二度,主場贏切爾達2:1;同巴塞一樣8戰全勝得24分,但巴塞得失球較好,所以排榜首。


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載