› 選擇地區
三藩市
紐約
洛杉磯
其他美國地區
香港 台灣 北美
 
2013年10月07日

柏案驚奇:點解鍾意弱隊? - 方栢翹

阿仙奴球迷今季終於笑得出。
資料圖片

睇波,基本目的是娛樂。對「初學者」而言,梗係邊隊勁就捧邊隊!故此香港80年代孕育了一批利物浦Fans;90年代便多了一堆曼聯躉。部份球迷索性更簡單:邊隊勁就捧邊隊!捧開嘅曼聯進入低潮,立即煙消雲散;愛隊隨即轉成阿仙奴、車路士、甚至曼城。有資歷較深嘅球迷,對上述「勝利球迷」深惡痛絕,認為他們膚淺、冇義氣!我又冇咁強烈嘅反應,睇波都係為娛樂啫,點解要捧隊輸嘅咁無癮?「勝利球迷」乃係人之常情。
有人愛埋堆,亦有人偏愛與眾不同:邊隊係風頭躉,就憎佢!我相信曼聯近廿年在英超贏到開巷時,好多人成為其挑戰者:紐卡素、阿仙奴、車路士及曼城嘅球迷,都係因「反曼」而起。我便見證身邊一位仁兄,由追隨兵工廠、轉到車仔再到前季「轉會」曼城,背後原因,不言而喻。
又有一類,連反強隊都嫌唔夠獨特,專愛捧冷門。可能因樸茨茅夫爆冷贏過屆足總盃,或者可能因修咸頓有場大炒過曼聯6:3,於是從此愛上。我當然欣賞鍾情細會球迷的情操;然而,外國球迷愛弱隊,多因那是其家鄉球隊,自出娘胎便受老爸薰陶,識行便每周被帶入場睇波,是成長的印記。這種原因捧一支弱隊,好像紥實多了。
當然,捧強隊都有長情的。紅軍迷、兵工廠迷,今季應該開OT都會無啦啦會心微笑,這是對愛隊一直堅持的回報;而曼聯躉看見球隊贏包尾大幡都要九牛二虎之力,你會選擇離棄,還是更加肉緊打氣?文:方柏翹

足本收睇《亂噏24》x 卓韻芝;緊接歡迎「宇宙最強」甄子丹!
周一至周五《亂噏24》預埋你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載