› 選擇地區
三藩市
紐約
洛杉磯
其他美國地區
香港 台灣 北美
 
2013年10月28日

求驗客手記:
反勝歸功調動好
莫耶斯囂番次

莫耶斯一時唔偷雞就做保長!曼聯前晚喺英超戲劇性地反勝史篤城3:2,唔使連續第3場喺奧脫福失分,賽後佢哋領隊莫耶斯即刻認屎認屁,全靠自己調動得宜,夠膽喺最後廿幾分鐘打3前鋒。
曼聯季初喺英超表現差,新帥莫耶斯責無旁貸,佢嘅排陣同埋調動,成日被笑係「小學雞」,但前晚就俾佢叻番次。紅魔主場對住史篤城,踢到77分鐘仲係落後1:2,不過之後喺3分鐘內憑朗尼及「小豆」查維亞靴南迪斯連入兩球,最終反勝3:2,佢哋嘅第3個入波,3個後備球員贊奴沙、路爾斯華倫西亞同埋「小豆」都有份參與個攻勢,所以莫耶斯賽後亦邀晒功,話自己臨場調動得好,球隊先至贏到波。

小豆逃過領紅變功臣

莫耶斯話:「場波好精采,我真係好享受呢場波。我哋半場落後,於是我同班球員講,我哋嘅任務係贏波,而且有能力做到。到最後,我哋用晒3個後備,結果由佢哋改寫戰局。我知道要喺下半場搶攻同搵機會入波,之後我哋踢3前鋒,而且全部都有波入(尹佩斯、朗尼同小豆),我真係好高興。」曼聯贏波莫耶斯就牙斬斬,講真,後備落場唔夠1分鐘就踢到對手後衞賀夫瞓低嘅「小豆」,如果唔係球證手鬆冇俾紅牌佢,曼聯邊可能反敗為勝呀!

紅魔「納粹」標誌捱轟

曼聯雖然贏波,但賽前因自己出錯而要道歉;話說佢哋send咗一篇名為「曼聯新秩序」嘅會訊畀粉絲(我求大俠都收到)。然而,由於佢哋將MUFC嗰4個英文字斜擺,望落去十足十納粹黨嘅標誌,加埋新秩序呢個主題,即時令人聯想起希特拉所謂嘅歐洲新秩序。於是紅魔亦嗱嗱臨道歉,事件就告一段落,但就搞到佢哋好鬼尷尬。
另外,本身為拳擊發燒友嘅朗尼,終於俾佢恨到,日前如願以拳手造型為Samsung手機拍攝廣告;但佢遲遲未得到曼聯續約,係因為曼聯嫌佢人工太貴,計過簽5年嘅話要成7,000萬鎊。

鄭中基@谷德昭搞笑孖寶再發功,笑彈繼續嚟!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載