› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

求驗客手記 :自傳搵出45錯處
費Sir,回水啦!

買咗費格遜最新本自傳嘅球迷要注意!原來你手上本書錯漏繁多,唔好信晒!外國球迷發現,呢本自傳至少有45項資料出錯;出版商承諾會回水。呢45項資料入面以日子錯誤為主,例如堅尼明明踢咗曼聯12年,但本書就寫咗11年,而傑斯明明17歲先幫曼聯上陣,但就寫咗16歲。

出版商承諾退款

除咗球員嘅資料,本書連費格遜自己嘅事都有錯,佢喺04年3月裝咗心臟起搏器,但本書就寫咗做02年4月,年份同月份都有錯。我求大俠就唔會怪費格遜嘅,始終佢都71歲,難免會記錯啲陳年舊事;但出版商Hodder and Stoughton就責無旁貸,佢哋理應搵編輯校對好啲資料先出街。費格遜今年5月先話退休,我求大俠數數手指,呢本402頁嘅自傳其實用咗4至5個月就出街,算唔算太匆忙呢?
出版商CEO賀頓威廉士話;「喺出版前,我哋已經搵過曼聯內部人士同埋足球專家核對過。經過呢個程序,我哋已經搵到大量錯誤,但未能做到全部準確。讀者對我哋嘅指正,可以幫到我哋再校對本書;或者喺未來嘅新版入面,我哋將會作出改正。如果你哋覺得本書唔值咁多錢,我哋感到抱歉,如果你肯將本書寄番嚟我哋總部,而且標明喺邊度買同幾多錢,我哋願意退番書錢同郵費。」
出版商補充,已經有一位讀者來信投訴,雖然佢冇寫到明本書錯啲咩,但佢話本書勁多錯,搞到佢好唔開心;出版商亦已回信,承諾回水咁話。我求大俠都唔知香港啲書局會唔會幫手退貨,但如果真係有讀者咁介懷呢啲錯的話,絕對可以將本書寄番去英國嘅出版商要求退款。

肥安都唔執輸

另外,皇家馬德里教練安察洛堤噚日亦出咗本自傳,書名叫《我的聖誕樹》,相信AC米蘭嘅球迷一聽就知個名點解,就係來自肥安成名嘅戰術4-3-2-1聖誕樹陣式。


足本收睇《亂噏24》x楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載