› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

求驗客手記:烏拉圭直飛英國戰打吡
阿蘇坐老細專機

打工仔表現好,老闆梗係錫晒啦。家陣喺英超排第2嘅利物浦,周六會作客葛迪遜公園球場,同愛華頓進行默西賽德打吡大戰。紅軍班主約翰亨利為咗隊中嘅王牌射手蘇亞雷斯(阿蘇),有多大半日時間休息以備戰呢場「6分波」,不惜工本出動自己架私人飛機,等阿蘇一踢完世盃附,就即刻由烏拉圭飛返英格蘭。
烏拉圭周三會喺主場同約旦進行世盃附次回合,場波開英國時間周三晚上11點,所以如果照原定計劃,阿蘇最快要到周五中午先返到英格蘭。利物浦作客對愛華頓場打吡,就喺周六晏晝12點45分開波,換言之阿蘇得番唔夠24粒鐘嚟備戰呢場英超大戰。

多大半日休息時間

紅軍今季打得好,家陣以7勝2和2負排次席;由於領先兩分嘅「1哥」阿仙奴會喺同日晏晝3點先至對修咸頓,所以如果紅軍贏到同市宿敵愛華頓,就會上榜首,班主約翰亨利梗係好重視呢場波啦!
英國傳媒話,約翰亨利為咗令今季喺6場英超入8球嘅阿蘇,能夠有百分百狀態踢呢場激戰,於是決定用佢架私人飛機,直接將阿蘇載返英格蘭。消息話,佢架機會由美國波士頓出發到烏拉圭首都蒙特維多,等場世盃附一吹完場雞,就接阿蘇上機直接返英格蘭利物浦。機程大約係16個半鐘,即係話,阿蘇最快可以喺英國時間周四黃昏返到利物浦,足足多咗大半日時間休息。
其實,烏拉圭足總同利物浦嘅關係向來唔錯。之前烏國足總冇用「5日前歸隊條例」撻紅軍,畀阿蘇幫佢哋踢埋對富咸場英超,先歸隊打作客對約旦嘅世盃附首回合。亦因為呢個原因,利物浦禮尚往來,冇要求幾可肯定出線嘅烏拉圭(首回合贏約旦5:0)特准阿蘇唔使踢而提早放人。聽講今次紅軍提出用私人飛機接阿蘇,烏拉圭足總都好配合,唔使佢一定要跟大軍一齊走。


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載