蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年11月21日
馬上成為壹會員

求驗客手記︰小獅威盡大獅羞家

英格蘭真係丟人現眼,周二主場友賽德國,賽前話要報上屆世盃出局之辱,朗尼預感擊敗德國會好爽,又話謝拉特打止痛針都要上陣,國仇家恨乜都齊,誓要剿滅德國云云……但人哋都冇你咁好氣,德國求其派啲副選出嚟應酬吓,已經搞到英格蘭一次中目標射門都冇,仲要36年來首次喺溫布萊兩連敗,真係樣衰到爆。

0:1負德冇次中框

英格蘭呢場都算齊腳,而德國都知英格蘭要面,順勢派副選出戰,當練吓班新仔。點知英軍呢班主力死晒火,乜嘢英超最紅兩大射手,又朗尼又史杜列治,結果一腳中目標射門都冇;安祖斯唐辛被英媒吹到超新星咁勁,一拍埋馬里奧葛斯同卻奧斯嗰度始終差啲,雖然佢有球中柱波,但整體嚟講仲有好多進步空間。英格蘭一向最勁係踢高波,中堅擅頂防守穩陣,點知今場連呢支歌仔都冇得唱,俾德國中堅梅迪薩卡頭槌破網,如果唔係門將赫特神勇,真係唔止輸0:1。

U21炒魚腩9粒破紀錄

連埋上周五以0:2不敵智利,英格蘭喺溫布萊兩連敗,睇番歷史,佢哋上次喺溫布萊連輸兩場已經係1977年,即係36年前嘅事。雖然英格蘭已經出線世盃決賽周,但領隊鶴臣自知隊波唔夠班,「呢場係殘酷嘅失敗,我哋需要更有質素嘅表現。我哋有努力過,但我哋喺對手半場用波時唔夠效率,唔似德國咁勁,佢哋嘅射門同傳球質素都好過我哋。」另外,呢場冇踢嘅菲爾鍾斯證實要唞一周,將會錯過曼聯對卡迪夫城同利華古遜兩場波。至於德國有3名球員曉姆斯、舒姆沙同謝路美保定受傷,唔知佢哋趕唔趕得切周末多蒙特鬥拜仁嘅德甲大戰。
大國腳丟架,小國腳就威水得多,英格蘭U21喺周二嘅歐國外對聖馬力諾U21大勝9:0,創下小獅嘅最大勝仗紀錄,其中利物浦嘅史達寧入咗兩球。


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載