› 選擇地區
三藩市
紐約
洛杉磯
其他美國地區
香港 台灣 北美
 
2013年11月22日

咖喱牛腩:球王冇得唞殘晒 - 咖喱

美斯俾國家隊同巴塞用到殘,希望佢今次有得好好唞吓喇。 資料圖片

上季玩完馬後炮,今季就做預言家,同大家一齊睇吓嚟緊周末有咩好睇。今周傾乜:玻璃腳美斯仲有冇貨交?

凡事太盡,緣份勢必早盡,美斯呢幾年去得太盡,後遺症開始出現:就係斷斷續續嘅傷患。如果巴塞教練團唔及早醒覺,一代球王隨時踢到殘。
美斯少年時代成日受傷,本身係玻璃底,直到哥迪奧拿上任巴塞教練後,佢先至突然變鐵人。喺哥帥嘅第一季,佢都錫住美斯,逢親國際賽期後嘅聯賽,哥帥都唔會搵美斯踢正選,只係畀佢打後備。但隨住美斯日漸成熟,加上佢喺球隊入面越來越重要,導致美斯越踢越多,休息就越來越少。
導火線係今年3月,美斯代表阿根廷去完玻利維亞高原作客踢足全場,4日後就返巴塞踢正選對切爾達;再過多3日,美斯隨隊作客巴黎聖日耳門,結果就喺呢場拉傷大腿;而呢3場比賽,阿根廷同巴塞全部贏唔到。小弟認為,美斯就好似一條拉行咗好耐嘅橡筋,大家見到佢拉極都未斷,就繼續拉。8日踢3場作客波,仲要去埋玻利維亞,真係球王都死。本來美斯呢條橡筋其實未斷住,只要佢安心養傷,就可以冇事;點知一星期後,巴塞話佢勉強好得番,雖然狀態唔掂,但都喺歐聯次回合對巴黎聖日耳門後備入替,結果一傷再傷!
根據外國統計網站資料,美斯喺2010年踢咗64場比賽、2011年踢70場、2012年踢69場。美斯已經連續幾年頻繁地比賽,有傷時又唔小心保養,以為做得幾年鐵人就可以做一世鐵人,但佢其實一直消磨緊自己嘅身體。文:咖喱

足本收睇《亂噏24》x張家輝;宅男女神謝安琪隆重登場!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載