› 選擇地區
三藩市
紐約
洛杉磯
其他美國地區
香港 台灣 北美
 
2013年12月17日

體壇拾趣:
夏登林瘋齊齊傷
火箭飛唔起

火箭周日作客帝王,原本以為就算林書豪背傷唔出得,呢場波都實食冇黐牙,點知主隊有新兵基爾,喺地標戰攻入26分,仲有中鋒吉辛斯貢獻21分、10個籃板,最後客隊以91:106慘敗!火箭仲有射手夏登喺比賽中扭傷腳,認真黑仔。
林書豪上場對勇士俾對手撞親,搞到背脊受傷,今場唔出得。正常嚟講,有柏臣斯、懷特侯活同夏登,都應該夠贏。不過,今場帝王有早前轉會嘅得分好手基爾,喺主場亮相打地標戰,全場20射10中,攻入26分之餘,仲貢獻咗4次偷波。

夏登扭傷腳慘負帝王

多咗個好幫手,唔怪得吉辛斯賽後都話:「基爾加盟減輕咗大家嘅壓力,雖然唔係話I湯馬士同我每場都打得好辛苦,但係多個得分點真係好有幫助。」
夏登喺第3節一次進攻嘅時候,俾對手侵犯仲扭傷咗左腳,仲用「金雞獨立」嘅姿勢射入罰球。雖然佢之後接受包紮繼續比賽,但係對球隊冇咩幫助,火箭最後都係要以15分之差大敗。夏登賽後話:「我淨係覺得好痛,𠵱家盡力保持正面嘅想法,希望可以盡快好番。」聽落好似好嚴重,佢隨時周三作客公牛打唔到,同林瘋齊齊做傷兵。而球隊嘅教練麥希就因為喪母要暫時離隊,今場同之後兩場都會由助教森遜做替工。

阿斯克快被換走

另外,近日有傳火箭另一位中鋒阿斯克,就好有可能喺近日被換走。有美國傳媒話,球會有可能用佢同騎士換入防守型中鋒華利奧。亦有傳火箭嘅目標,係今季加盟鷹隊嘅米爾沙,貪佢肯打爛仔波。聽講塞爾特人嘅J格連,都係火箭嘅目標之一。


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載