› 選擇地區
三藩市
紐約
洛杉磯
其他美國地區
香港 台灣 北美
 
2013年12月17日

求驗客手記:
隊長蘇狂炒刺變死神
波亞斯拜拜

隊長臂章加身,蘇亞雷斯果然生晒!周日英超利物浦作客熱刺,因謝拉特有傷缺陣,前鋒蘇亞雷斯暫代隊長,交出兩入球3助攻,協助紅軍5球血洗白鹿徑;可憐波亞斯周一即被球隊辭退,成為英超今季第5位被炒領隊(見附表)。

正所謂能力越大,責任越大,蘇亞雷斯今期排英超神射手榜首,領隊羅渣士呢場就畀埋隊長佢做。之前阿蘇就麻煩多多,又插水又咬人,不過做咗隊長當堂成熟晒,開波前握手禮期間,一個熱刺幸運女童向佢扮鬼臉,又扮唔同佢握手,阿蘇都冇發火,真係有大將之風。

兩入波3助攻派5蛋

場波一面倒,阿蘇上下半場各建一功外,今季累積到17個英超入球,仲做埋助攻王,佐敦軒達臣、法拿根、史達寧人人受惠。熱刺輸波之餘仲輸埋品,巴西中場荷西保連奴63分鐘向阿蘇施以穿心腿,俾球證紅牌趕離場;主隊全場都冇次中目標射門,難怪70幾分鐘開始,已經見球迷提早離場。

英媒傳卡比路接手

熱刺繼11月尾作客輸畀曼城0:6後再度大敗,主席利維喺看台睇到黑晒口面,雖然賽後波亞斯肯孭飛,話輸波自己要負最大責任,不過球會管理層周一開危機會議後,終於宣佈與波亞斯達成離隊協議。雖然加里夫巴利季初離隊,球隊都畀足子彈波亞斯擴軍,今夏使費達1.1億鎊,使凸埋賣巴利嗰份,但買返嚟嘅拉美拿、伊天卡普爾等貢獻有限;另外,波仔11同13年分別帶車路士同熱刺嚟香港,出戰巴克萊亞洲挑戰賽,結果返到英格蘭都俾人炒,似乎香港都唔利波亞斯嘞。英國《每日郵報》傳由卡比路接手,不過佢準備帶俄羅斯踢世界盃,應該唔得閒啩?
呢個世界落井下石嘅人就多,雪中送炭嘅人就少,被打入冷宮嘅前鋒艾迪巴約同被外借嘅後衞伊高圖,周日相約齊齊睇直播,當球隊輸0:5後,兩人笑笑口舉起3隻同2隻手指寸熱刺輸5粒,仲放埋上網;玩到咁大,就算波仔走咗,都激嬲一眾隊友實冇運行。


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載