› 選擇地區
三藩市
紐約
洛杉磯
其他美國地區
香港 台灣 北美
 
2013年12月20日

咖喱牛腩:炒領隊等於止蝕 - 咖喱

波亞斯(圖)上季被車路士炒,主因就是在更衣室失軍心。資料圖片

上季玩完馬後炮,今季就做預言家,同大家一齊睇吓嚟緊周末有咩好睇 。今周傾咩:領隊唔對路就要炒?

呢條辯題有少少複雜,假設咗英超球隊係急功近利,所以成日急急腳炒領隊。小弟首先要指出,季中炒領隊唔係英超嘅特有現象,以今季為例,英超暫時炒咗5個,法甲亦有5隊換咗教練,意甲同葡超就有4隊,德甲同西甲都各有3隊。從整體歐洲球壇炒教練嘅風氣嚟睇,英超唔算係特別炒得密。
小弟想問大家一樣嘢,因為急功近利而炒領隊,有咩問題?當水晶宮喺榜尾沉淪,為嘅就係要急功近利,喺短期內打番起隊波,避免降班,唔通等到半季之後仲係個位數字分數先炒咩?到時費格遜嚟教都降班啦!球隊炒唔炒領隊,同買股票幾時止蝕一樣,當你見到呢個領隊冇料到,隊波只會越搞越衰時,就要當機立斷咁炒,否則成績只會越來越差,蝕得仲入肉。
之後就會出現一個關鍵嘅問題,點樣識別出邊個領隊冇得救,等球會及早止蝕?小弟認為做領隊最緊要得人心,如果失去更衣室嘅支持,就係唔對路,要即炒,冇得拖。假如一個球員玩嘢係個別問題,咁大班球員玩嘢就應該係領隊人力資源管理嘅問題。好似波亞斯當年俾車路士炒,佢得罪咗更衣室嘅大佬,佢仲要一次過得罪晒泰利、林柏特同杜奧巴!失去軍心嘅主帥就只係無兵司令,球會一日唔炒領隊,球員會用表現去控訴,越踢越差,誓要逼走個領隊為止。
文:咖喱

足本收睇《亂噏24》x DADA陳靜;跟住有嘉玲姐駕到!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載