› 選擇地區
三藩市
紐約
洛杉磯
其他美國地區
香港 台灣 北美
 
2013年12月20日

求驗客手記:
世冠盃出局仲要被搶砵 細哨慘情

周三世冠盃4強戰,南美代表明尼路爆冷1:3輸畀東道主摩洛哥球隊拉查體育會,無緣入決賽同拜仁慕尼黑爭冠軍。呢場波明尼路嘅朗拿甸奴雖然射入一球靚罰球,但最後都要輸波,始終同世冠盃錦標緣慳一面。細哨唔單止輸波,賽後仲要畀一班拉查球員搶走埋波砵,真係冇理佢嘅感受。

周六同恒大爭季軍

拉查體育會佔主場之利,喺下半場6分鐘由前鋒耶祖亞打破僵局領先;去到63分鐘,明尼路喺禁區頂獲得自由球,呢啲食糊位梗係由老將朗拿甸奴處理,佢起腳一射皮球彎入遠柱中內柱彈入網內,拉查門將都係得個睇字。

乜盃都有獨欠世冠

去到比賽最後階段,拉查體育會由耶祖亞博得12碼,守將達杜尼主場喺83分鐘再次領先,到補時階段主隊再由中場馬比迪入多粒奠定勝局。拉查以3:1贏波,之後會喺周六同拜仁爭冠軍,而明尼路就只可以同廣州恒大進行季軍戰。
細哨喺佢職業生涯連世界盃都贏過,就獨欠世冠盃冠軍。佢喺06年效力巴塞隆拿嘅時候本來有機會,可惜喺決賽輸咗畀國際體育會;點知今次仲衰第一場比賽就下馬。失望到極點嘅細哨喺完場之後,同對手交換完球衣仲戇居居咁企喺場上,其他拉查球員見佢仲喺度就紛紛走埋去睇吓有冇得撈粗嘢。雖則話就話係過氣球王,但可以同朗拿甸奴交手真係有今生冇來世,拉查球員老實不客氣,郁手除咗細哨對波砵,其他球員都唔執輸,冇鞋拎連細哨波襪入面塊護脛都唔放過。被「洗劫」嘅朗拿甸奴之後好無奈咁離開球場。
對恒大嚟講,呢場爆冷賽果都算係好消息,可以喺今次世冠盃對完拜仁再鬥朗拿甸奴,都係相當唔錯嘅經驗。明尼路教練古卡據講會喺下季轉投中超球會山東魯能執教,季軍戰當係提前同中國球隊交手,佢喺賽後話:「我哋會喺季軍戰全力以赴為尊嚴而戰,目標係要贏波。」

足本收睇《亂噏24》x DADA陳靜;跟住有嘉玲姐駕到!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載