› 選擇地區
三藩市
紐約
洛杉磯
其他美國地區
香港 台灣 北美
 
2014年01月06日

求驗客手記:
過百Fans接機
本田瘋魔米蘭

本田圭佑(右二)戴住黑超登陸米蘭,非常有型。美聯社

廿年前,有位日本小朋友寫咗一篇《我的志願》,佢寫住:「我要喺世界盃揚名立萬,然後有外國球會邀請我,前往意甲,成為主力,穿上10號球衣,為球隊發光發熱。」今年,呢位小朋友已經長大,仲達成夢想,加盟AC米蘭,未來將會着上紅黑軍團嘅10號波衫,佢就係本田圭佑。

兒時已係A米球迷

上星期六晚,米蘭機場逼滿人,有揸住攝錄機同相機嘅記者,亦有着A米波衫嘅球迷,加加埋埋都成幾百人。唔使等好耐,着住西裝,戴住黑超嘅本田,好似英雄咁行出嚟,即時引起哄動。本田心情好好,唔止同球迷揮手,仲接受記者嘅訪問:「我終於夢想成真!嚟到呢度,我好激動!我喺飛機度瞓得好好,已經為比賽做好準備,好期待同新隊友見面,我相信自己可以幫助球會。A米係我一直鍾意嘅球隊,細細個就已經捧佢哋。」
本田亦講起另一位日本國腳,效力國際米蘭嘅長友佑都:「我同長友傾過電話,佢係我好朋友。足球係我生命,希望可以有好表現。其實,我踢咩位置都得,我識入波,又識創造機會。」A米官網同日正式宣佈本田以自由身加盟,同埋佢會着上10號球衣。雖然本田已經嚟咗,但喺今晚對阿特蘭大嘅意甲,佢只會喺看台做觀眾。星期三AC同本田會正式舉行加盟記者會,到下輪作客薩斯索羅,本田好可能上演佢嘅A米處子騷。

巴神或重投文仙尼懷抱

另外,意大利傳媒爆料,A米前鋒巴洛迪利可能會轉投加拉塔沙雷,同佢契爺文仙尼重逢。意媒指,巴神嘅經理人已經同加拉塔沙雷代表見面,傾吓轉會嘅可能性。我求大俠仲記得,巴神仲踢緊曼城嗰陣,試過同嗰陣教緊曼城嘅文仙尼喺訓練時大打出手,唔通文帥呢次唔怕畀佢契仔打多次?


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載