› 選擇地區
三藩市
紐約
洛杉磯
其他美國地區
香港 台灣 北美
 
2014年01月08日

求驗客手記:助皇馬炒切爾達
C朗400球悼黑豹

「黑豹」尤西比奧周日病逝,作為新一代葡萄牙足球icon嘅基斯坦奴朗拿度(C朗)總算收拾心情,喺周一西甲聯賽個人梅開二度,協助皇家馬德里主場3:0輕取切爾達。累積球員生涯第400個入球嘅C朗,入球後雙手指天,以入球為黑豹送行。
皇馬雖然同尤西比奧冇咩淵源,不過陣中都有好多葡萄牙球員,好似C朗、比比、法比奧干查奧等,周一對切爾達賽前,都搞個簡單而隆重嘅哀悼儀式,巴拿比奴球場大電視播出尤西比奧以往比賽雄姿,全場默哀。

「將入球獻畀佢」

C朗一直都好尊敬呢位葡萄牙一代前鋒,帶住傷感正選比賽;皇馬先由賓施馬門前建功打破僵局,82分鐘C朗接應丹尼爾卡華積傳中近門射入,領先至2:0;入球後C朗雙手指天,將入球獻畀黑豹;補時階段,巴利助攻畀C朗,射成3:0,呢個入球對C朗又有另一番意義,因為係佢球員生涯累積第400個入球。
梅開二度嘅C朗賽後感觸咁話:「星期日我成日都好唔開心,因為尤西比奧帶畀我哋葡萄牙足球係好大意義,我將入球獻畀佢。佢係一位好可愛老人家,一直支持我,對國家隊亦十分關心;我感謝大家對佢嘅悼念,葡萄牙感受到西班牙,以及全世界嘅慰問。」另外,尤西比奧母會賓菲加,周一就係光明球場舉行悼念黑豹活動,過萬球迷向呢位葡萄牙巨星送別。

迪馬利亞做不文手勢

講番皇馬場波,C朗雙手指天贏得掌聲,迪馬利亞嘅不文手勢就惹禍上身;呢位阿根廷快翼今仗表現低迷,下半場被調離場,由巴利入替;換人期間,主隊球迷向佢勁噓,佢就用手抓下體,有挑釁舉動,賽後教練安察洛堤鬧佢嘅行動不理智。
其實迪馬利亞嘅地位已經俾巴利搶緊,今次仲激嬲皇馬球迷,睇嚟都難留銀河艦隊。

足本收睇《亂噏24》x鄭秀文@杜琪峯;再有卓韻芝!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載