› 選擇地區
三藩市
紐約
洛杉磯
其他美國地區
香港 台灣 北美
 
2014年01月08日

轉全職泳手 9月攻亞運
歐鎧淳畢業大計

Stephanie今年5月就大學畢業,看她一臉自信笑容就知她前途一片光明。 徐嘉華攝

對一眾90後嚟講,畢業等於失業;但對今年5月就喺美國柏克萊大學畢業嘅21歲「美人魚」歐鎧淳(Stephanie)嚟講就冇有怕,皆因佢已經搵到寄託,就係為9月仁川亞運續留柏克萊泳隊練水,兼轉做全職泳手。

相關新聞:何姿、何冲齊膺跳水最佳

5月戴四方帽好興奮

大學主修環境經濟學嘅Stephanie,用「興奮」嚟形容即將畢業嘅心情:「好似讀咗書咁耐,終於告一段落,我暫時冇諗過要繼續讀,只係覺得夠啦;由小學到中學到大學,除咗08年備戰北京奧運停過半年學外,都未試過唔讀書,𠵱家真係好『期待』畢業嗰日,着住畢業袍、戴四方帽嘅情景。」Stephanie將於5月18號行畢業禮,父母已訂定機票去觀禮㖭!
品學兼優嘅Stephanie,10年喺嘉諾撒聖心書院畢業,以會考23分直升美國名校柏克萊大學,讀書大部份科目攞A外,兼年年入選柏大校隊參加NCAA(全美大學生泳賽),仲攞咗兩隻冠軍指環。今年3月嘅NCAA,佢已十拿九穩攞到參賽資格,準備第4次落場,同隊仲有新加入柏大嘅倫奧4金得主、有「女費斯」之稱嘅法蘭克琳。

中學死黨撐繼續游

其實Stephanie畢業就算唔做全職泳手,以佢嘅履歷,都唔怕搵唔到工;之但係佢問過好多外人,尤其係一班中學死黨,個個都贊成自己繼續喺泳壇大展拳腳:「我班中學同學都覺得,做嘢幾時都做得,但如果停咗唔練水,就冇得再嚟過,我覺得佢哋講得好啱。」其實除咗一班死黨嘅建議外,去年8月世錦賽歷史性成為香港首位闖入50米背泳準決賽嘅泳手,仲有上月底獲香港游泳教練會頒發「全年最佳女泳員」大獎,都令小妮子對游泳重拾信心:「世錦賽後我嘅信心多咗,好想喺亞運做到一啲近10幾年冇人做到嘅成績,好似包辦個人項目及接力獎牌。」大家拭目以待啦!

足本收睇《亂噏24》x鄭秀文@杜琪峯;再有卓韻芝!
周一至周五《亂噏24》約定你: http://bit.ly/appletalk24

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載