› 選擇地區
三藩市
紐約
洛杉磯
其他美國地區
香港 台灣 北美
 
2014年01月27日

求驗客手記:驚天倒掛被撲出
C朗慘過輸歐聯

C朗(中)上半場驚天倒掛金勾,可惜徒勞無功。美聯社

踏入2014年,皇家馬德里翼鋒基斯坦奴朗拿度(C朗)真係要風得風,要雨得雨,拎完金球獎又受勛,上周六西甲聯賽主場對CF格蘭納達,賽前仲拎埋個金球獎同主場球迷分享光榮,不過人總有遺憾美,C朗雖然攻入一球,協助皇馬2:0勝出,但上半場一個驚天倒掛金勾,就畀對方門將救出,難怪射唔入之後,C朗仰天長嘆。

金球獎閃耀巴拿比奴

皇馬完成連同盃賽連續4場作客,亦喺C朗攞完13年金球獎後首次返巴拿比奴球場比賽,佢當然帶埋個獎同隊友,以及全場超過8萬球迷慶祝。面對中游分子CF格蘭納達,C朗梗係想入埋波,令呢個慶祝派對更完美,上半場已經不斷向客軍大門狂轟,但一一被客軍門將羅拔圖費南迪斯化解,包括上半場補時階段,C朗接應莫迪歷傳中,嚟一個倒掛金勾,離門僅得7碼,又射得好勁,不過羅拔圖費南迪斯仲可以神救擋出,回身救埋加里夫巴利嘅頭槌補中;C朗睇住呢個美妙射門未能轉化入球,當然氣頂長嘆,搞到好似歐聯決賽12碼射唔入咁大件事。

又入首球領放射手榜

不過面對皇馬圍攻,羅拔圖費南迪斯縱有幾好身手,喺下半場都要失守,56分鐘客軍後衞迪亞加迪受傷倒地,皇馬懶理繼續攻,結果C朗禁區邊轉身快射,收死羅拔圖費南迪斯,攻入今仗首球,更入咗第22個聯賽入球,西甲神射手繼續領放;76分鐘賓施馬幫皇馬埋齋,順利贏到2:0,連同盃賽9連勝,更難得近7場保清白身㖭,教練安察洛堤真係有啲功力。C朗賽後就好謙虛:「金球獎嘅榮譽係全隊功勞,所以今仗就同大家分享;上半場嘅倒掛真係好靚,可惜對手門將企位好,亦都撲得好,射唔入真係唔好彩。」C朗威風,巴利就慘,上半場被對手踢中要害,半場完就要退下火線,好彩安帥就話巴利傷勢唔算嚴重,休息1、2日就可以好番。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載