› 選擇地區
三藩市
紐約
洛杉磯
其他美國地區
香港 台灣 北美
 
2014年02月09日

開波Kick off:你係咪傳染咗我? - 馬啟仁

當球場人人有妄想症,你正常就係唔正常。

有時我懷疑,太過陽光樂觀嘅朋友係唔太受歡迎嘅。凡事都向好嗰邊諗,甜的吃苦的也吃呢種咁「吃得開」嘅性格,本身可能就係毫無性格。識着啲咁嘅朋友,若你同佢傾吓心事,呻吓啲唔開心嘢的話,佢都係話題終結者,「係咁㗎啦,呢個世界!」「唔緊要啦,重新嚟過吖!」呢啲表面好樂觀豁達嘅說話,聽咗等於冇聽,咁嘅陽光朋友,你話係咪有等於冇吖!
今時今日,要做到一個受歡迎嘅傾心事朋友,多少要有啲病,呢隻病叫做「妄想被迫害症」。逢親有呢隻病嘅朋友,講嘢同諗嘢就似番個人好多嘞!雖然病患者本身容易焦慮、不安甚至口乾,但好在佢總係好易搵到同道中人,當大家同一口徑嘅時候,就會負負得正好番嘞。
前兩日路過佐敦,忍唔住行去澳牛門口,點知原來佢新正頭咁耐都仲係落閘放狗。我利申,唔係想幫襯,只係想貪過癮睇吓門口條人龍啫。係,正如前排篇網上潮文所講,點解咁多人又要食又要俾人鬧都肯制呢?抑或係過程越痛苦,回憶就越淒美呢?澳牛之後又有渣馬嘅新潮文,當人人都喺呢項一年一度嘅盛事上面,冠於無限咁多嘅正能量大合唱,有朋友仔就走出嚟篤爆咗,其實咁多位健兒都係貼錢買難受;又晨咁早起身,又少人打氣,又要入隧道吸廢氣,有冇諗過我哋都係受緊迫害,應該要抗爭到底,爭取更好嘅權利呢?
球場上就仲離譜,自己贏唔到就話人哋打消極足球;借個球員返嚟有傷就話人哋呃秤;球隊表現差啲就話領隊係卧底;球員被趕咗出場就話對手詐諦;球證畀紅牌就話佢偏心;足總唔肯取消停賽就話包庇球證;個球員受傷倒地係咁「典」又話佢虛偽;唔買球員就話佢孤寒;賣球員就話佢貪錢;炒領隊就話球會短視;唔炒領隊又話球會冇嚟大志、婦人之仁……
唔好俾妄想被迫害症呢個名嚇親,其實染上呢個症少少不但冇乜嘢,做人反而仲有態度得多㖭!從今做人,不妨凡事向衰嗰面諗咗先,型好多!
KEYMAN

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載