› 選擇地區
三藩市
紐約
洛杉磯
其他美國地區
香港 台灣 北美
 
2014年03月15日

體壇拾趣:
呻「三叔」電話死機
占士米已倒

勒邦占士自從對住山貓狂入61分之後就死晒火,包括上場對網隊絕殺衰咗,間接搞到熱火近5場輸4場。場內表現跌watt,場外大帝亦自斷米路,竟然公開彈贊助佢嘅「三叔」唔掂。

件事係咁嘅,喺twitter有120萬信眾嘅大帝,前幾日發文話部電話發神經,無啦啦delete晒入面啲嘢,然後自動重新開機,令到佢非常不安。不過,大家都知占士係「三叔」代言人,而且有別於其他有份代言嘅名人,大帝本人都真係用「三叔」手機;咁樣倒米法,今次贊助商真係多得佢唔少。

急刪留言兼補鑊

雖然事後佢都知衰,半個鐘後就急急刪除留言,仲識do地改口話驚險一場後已經冇事,搵得番晒啲資料,仲想用「Lol」嚟消除尷尬。不幸地,喺呢個有圖有真相嘅世界,唔少網民圖已cap,大帝想補鑊都為時已晚。而「三叔」嘅主要競爭對手「台灣牌」亦乘機出嚟抽水,回覆大帝嘅言論:「世界上最好嘅球員應該要用世界上最好嘅智能手機。」畀佢哋攞晒彩。
其實大帝得失大財主早有前科,除咗今次「三叔」事件,之前亦都倒過「一剔」米,成日都唔肯着新出嘅LBJ 11比賽。

得失「老細」有前科

身家以億億聲計嘅大球星可能都係大牌啲,占士就算對住真正米飯班主嘅球迷都唔賣賬,包括廣為一眾港澳球迷熟悉嘅FO事件:當年一心去澳門朝聖嘅狂熱球迷巧遇大帝,點知問偶像攞簽名被拒之餘,仲俾佢問候,亦因為咁,FOJ呢個名應運而生,從此「流芳百世」。
可能因為睇見老友出洋相,經網上瘋傳成為國際笑話,占士嘅隊友兼老友獲迪就喺instagram貼咗張搞笑改圖,疑似想幫占士分散吓民眾嘅注意力。張相取材自97年NBA總決賽,波神米高佐敦帶病上陣入38分嗰場,賽後不支挨落柏賓嘅經典一刻。
改圖入面嘅獲迪係柏賓,而占士就係佐敦;唔知獲迪係玩謙虛,自認好似柏賓咁,只係擔當輔助角色嘅「二哥」,定係其實喺度寸緊老友嘅髮線似波神呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載