› 選擇地區
三藩市
紐約
洛杉磯
其他美國地區
香港 台灣 北美
 
2014年03月18日

求驗客手記:國家打吡前發威
美斯=紀錄王

嚟緊嘅周日,西甲就上演國家打吡戰,巴塞隆拿同前鋒美斯就係大戰前夕盡show「哥利」;周日主場以7:0狂數奧沙辛拿,連中三元嘅美斯,就累積個人第371個入球,成為巴塞隊史入球王,點到一班皇馬兵唔驚。

入371球巴塞之最

巴塞隆拿上周中擊退曼城殺入歐聯8強,周日面對西甲中游球隊奧沙辛拿,入波就好似食生菜,18分鐘美斯已經先開紀錄。其實巴塞呢輪狀態反反覆覆,但呢位阿根廷球王始終保持狀態,近9仗有8場有波入,完場前88分鐘攻入個人第3球,球隊已經贏到6:0,對戰果冇咩意義,不過佢就累積到371個入球,超越名宿保連奴艾簡達拿1912至1927年間嘅紀錄,成為巴塞歷史入球王。
講美斯嘅紀錄,真係好似一疋布咁長,隨便數都有隊史聯賽、隊史歐聯紀錄,如無意外都好快會打破魯爾嘅歐聯入球紀錄;不過紀錄還紀錄,巴塞仍然落後皇馬4分,下周日作客巴拿比奴嘅國家打吡先最緊要,美斯賽後就講:「我個人紀錄不重要,最重要係球隊創歷史,下場作客皇馬將決定西甲冠軍形勢,我哋要努力爭取好結果。」美斯賽後接受巴塞官網訪問,仲着番同年初金球獎頒獎禮同色嘅紅色西裝,金球獎就輸左畀C朗,唔通國家打吡戰前,想向死敵示威?

小白入球獻「亡兒」

魯營除咗威風一面,仲有感人場面,「小白」恩尼斯達早前因為太太小產,缺陣對華拉度列嘅聯賽,佢攻入1球後就指天慶祝,希望將入球獻畀上咗天堂嘅囝囝。
另外,巴塞教練馬天奴講明,已經諗好國家打吡嘅正選名單,佢就拒絕回應係唔係同今場一樣,但尼馬、法比加斯一打後備,球隊就順風順水,似乎佢兩位嘅正選位置有啲危。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載