› 選擇地區
三藩市
紐約
洛杉磯
其他美國地區
香港 台灣 北美
 
2014年05月12日

求驗客手記:淚灑聖西路
辛尼迪完美告別

辛尼迪(右)同埋一家大細向支持者致謝。 路透社

辛尼迪幾乎將整個足球生涯都奉獻畀國際米蘭,效力咗19年之後終於都要講拜拜。40歲嘅辛尼迪早前已經宣佈會喺今季後掛靴,上周六意甲係佢最後一次披上藍黑戰衣喺聖西路球場比賽,傳奇完美告別氣氛感人。

19年忠臣征戰857場

其實上周六國米主場對拉素呢場波都幾關鍵,賽前兩隊仲爭緊歐霸盃參賽席位,結果國米喺先失守下由柏拉斯奧梅開二度,加上莫路伊卡迪同靴蘭尼斯各建一功,以4:1反勝對手,提早鎖定下屆歐霸盃資格。不過,講到尾辛尼迪先係今場波嘅主角,想當年呢位阿根廷小子未夠22歲,就喺95年由班菲特加盟國米,見證過呢支意甲球隊嘅起起跌跌,身邊隊友換過一班又一班,一眨眼已經19年,為球隊踢咗857場比賽,上周六就係佢最後一次喺聖西路落場比賽。

掛靴留隊做高層

被列為後備嘅辛尼迪,喺下半場7分鐘入替莊拿芬施些路一刻,聖西路所有人一齊起立鼓掌。球會為佢特製咗一個隊長臂章,上面繡咗「ZANETTI 4 EVER」;完場後球場中圈擺咗巨型辛尼迪4號球衣,隊友們亦着住印有4字嘅外套致敬。辛尼迪個囝囝Tommy仔亦在場,好得意咁帶住個波四圍走,唔知係咪想承繼老竇衣缽?
場上未講嘢已經眼濕濕嘅辛尼迪,唔捨得都要同聖西路球迷講再見:「我為各位對我嘅愛戴喜極而泣,今晚絕對係永世難忘,𠵱家喺我腦海中閃過好多畫面。作為國米球員咁多年,我感謝喺我足球生涯支持過我嘅人,同埋莫拉提。」前球會主席莫拉堤都有到場,佢話:「辛尼迪係我入主嗰陣最先收購嘅球員之一,我同佢嘅關係好特別。我覺得其實佢仲可以繼續踢落去。」
下周意甲煞科戰後,辛尼迪就會正式結束球員生涯,但國米球迷又唔使太失落,因為佢將會繼續留喺度出任球會高層,轉個身份繼續服務國米。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載