› 選擇地區
三藩市
紐約
洛杉磯
其他美國地區
香港 台灣 北美
 
2014年05月16日

求驗客手記:歐霸決賽負西維爾
賓菲加難破魔咒

一次半次可能係巧合,連續出現8次睇怕都好難唔信邪。賓菲加喺周三歐霸盃決賽同西維爾踢足120分鐘都冇波入,到互射12碼以2:4飲恨,連續兩年喺呢項賽事決賽飲恨。上年已經講過賓菲加中咗「古特曼魔咒」,逢打入歐戰決賽都冇運行,到今年已經係第8次全部應驗(見附表)。
古特曼(Bela Guttmann)係邊位?話說呢位已經過咗身超過30年嘅匈牙利教練喺1959年帶領波圖贏葡萄牙頂級聯賽冠軍之後,就過檔去賓菲加執教,好快到61同62年就幫球隊連贏兩屆歐冠盃錦標。之後佢同球會突然決裂,有一個說法係話賓菲加冇兌現承諾發放獎金畀佢;另一講法係古特曼覺得有成績就應該加人工,主動走去要求點知被拒絕,最後就係佢離咗隊,仲狠落咗個詛咒「100年之內賓菲加都唔會喺歐戰贏冠軍」。

相關新聞:求驗客手記:歐洲盃賽西甲玩晒

古特曼百年詛咒應驗

賓菲加俾你搞一搞就慘咯,63年再打入歐冠盃決賽輸畀AC米蘭,之後到今年歐霸盃已經係第8次打入歐戰決賽。賓菲加想喺今季做4冠王嘅美夢已經玩完,惟有希望喺周日葡盃決賽可以贏到里奧艾維,做本土3冠王安慰吓。

互射12碼輸2:4

講番周三場決賽,賽前已被睇高半線嘅賓菲加,整體形勢比西維爾好,但就係入唔到波。賓菲加喺互射12碼先後有奧斯卡卡度素同洛迪高摩連奴射失,西維爾就4射全中贏4:2封王。主帥謝蘇斯賽後話:「我哋喺呢場波越踢越好,有好多埋門機會,𠵱家惟有好好備戰星期日另一場決賽喇。」賓菲加連衰8次,睇怕唔信邪都唔得,我求大俠建議佢哋不如燒下香做番場法事去消除古特曼嘅怨氣,如果唔係就要等多48年先有機會贏歐戰冠軍。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載