› 選擇地區
三藩市
紐約
洛杉磯
其他美國地區
香港 台灣 北美
 
2014年05月16日

體壇拾趣:張德培外父相恨生仔

Michael昨全程用英語同本港球手分享心得,大家聽得津津有味。曾顯華攝

「頭皮?No way!」嘅張德培(Michael)又嚟啦,噚日喺香港出席一間健身中心委任佢做亞洲區榮譽大使嘅記者會,眼前42歲嘅Michael,除咗頭髮稍為稀疏外,身形keep得唔錯,佢大賣口乖話全靠細自己12年嘅太太(Amber)同兩個活躍囡囡嘅功勞,講到前1哥費達拿上星期啱啱添咗兩個囝囝,Michael有啲葡萄味,因為計埋自己哥哥張君培嘅4個女,張家一門生咗6個都係囡,佢大爆70幾歲嘅父母恨抱孫仔恨到流口水!

羨慕費達拿添丁

「我覺得費達拿生完孖女後再生孖仔,真係難以置信,比攞大滿貫仲難!我父母都想我哋追個仔,我同Amber會再生,若然再係女也冇所謂,𠵱家兩個女(3歲Lani、1歲Maile)都好可愛,成日走嚟走去,要我追餐死,想肥都難。」難怪Michael話𠵱家160磅嘅體重同以前打職業賽時差唔多啦。
已經有4年冇嚟香港嘅Michael,噚日吸引半百內地及本港記者到場,近日佢愛徒錦織圭成績好好,世界排名升至新高嘅第9,間接令Michael人氣急升。佢今晚出席完健身中心活動後,聽日或會帶囡囡去海洋公園,下周日(18號)就飛去巴黎同錦織圭會合,準備本月底嘅法國網球公開賽,佢話愛徒有贏大滿貫甚至做世界1哥嘅可能,但唔係𠵱家,佢期望錦織圭喺法網可以入8強:「錦織圭嘅背傷唔太緊要,下星期會同佢備戰,目標先定8強,再睇佢能走幾遠。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載