› 選擇地區
三藩市
紐約
洛杉磯
其他美國地區
香港 台灣 北美
 
2014年06月18日

森巴嘉年華:「俾你貼」唯我獨黐
巴神Why Always You?

「巴神嘅世界,你永遠唔會明白。」隨住科技嘅進步,連經典嘅「俾你貼」,都有好多人已經轉咗玩網上版。但係巴洛迪利呢個90後就堅持傳統,因為只有傳統版本先可以做到呢樣嘢:貼晒成版意大利都係巴洛迪利。
冇錯,巴神就係咁可愛。佢唔識着龜背、單刀要慢步思考人生、會同領隊打交、入完波會除衫晒肌肉、會放煙花燒自己屋企、佢仲會儲齊14張自己嘅俾你貼貼紙,貼晒喺意大利嗰頁,簡直係當其他隊友冇到。當佢完成呢個創舉後,仲要影張相放上Facebook,再加上佢嘅名句「Why Always Me?」如果唔識巴神,真係可能會以為,點解世上會有隊波,啲球員個樣仲難分辨過啲南韓人造人。
無論巴神幾自大都好,見到佢呢啲行為,只會覺得佢好可愛,而唔係寸。況且,巴神喺對英格蘭場波,真係有好表現。雖然佢靚到絕嘅窄角度笠射,俾菲臘積基爾卡救到空門,但最後都力壓加利卡希爾,頂入反勝1球,賽後仲被選為最佳球員㖭。不過巴神真係一個超級大細路;日前佢喺球隊嘅操練期間,突然從後抱起咗拿玻里前鋒恩斯治尼,仲轉咗兩個圈。巴神自己就笑得好開心,恩斯治尼就有啲無奈,而包括派路在內,附近嘅隊友都好似已經見怪不怪,乜反應都冇。

傳雲格有意收「兵」

雖然麻煩多多,但佢始終都係一個有天份嘅球員,所以巴神都吸引到唔少豪門嘅注意㗎。有傳阿仙奴領隊雲格都打算向AC米蘭提出收購。巴神咁貪玩,會唔會激死教授?如果巴神真係成為槍手,真係邊個激邊個都未知,因為有傳獨具慧眼嘅雲格,睇中咗曼聯兩大「天才球星」基斯史摩寧同湯卡華利,如果要同佢兩個做隊友,我諗被激死嘅,係巴神囉。

識睇 一定睇蘋果嘅足動世盃:
http://worldcup2014.appledaily.com/

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載