› 選擇地區
三藩市
紐約
洛杉磯
其他美國地區
香港 台灣 北美
 
2014年06月23日

森巴嘉年華:勁中波膽睇死狂牛
李榮杓勁過保羅

仲記得上屆南非世界盃,有隻叫保羅嘅八爪魚,估波勁準,預測8場波嘅勝方中晒。可惜嘅係,保羅已經喺2010年10月離開我哋,結束咗佢短暫而光輝嘅生命。保羅出咗名之後,全球各地出現咗好多所謂「新保羅」嘅動物,有龜啦、駱駝啦、仲有豪豬同河馬㖭。不過佢哋全部都唔入流,冇一個有資格做保羅接班人。

一提李根鎬就入波

真正嘅「新保羅」終於出現,仲青出於藍㖭!佢並唔係咩松鼠犀牛大笨象嘅動物,而係人類。呢位為人類爭光嘅,就係李榮杓嘞!踢過燕豪芬同熱刺嘅02年南韓世盃殿軍國腳李榮杓,掛咗靴之後走咗去做講波佬。咁做得講波佬,好多時都會預測吓賽果,而佢嘅貼士準到得人驚,仲要講咩中咩。南韓對俄羅斯場波,李榮杓有份做評述,賽事期間佢話李根鎬係「可以摧毀俄羅斯防線嘅武器」,結果呢位效力尚州尚武嘅前鋒,後備入替只係10分鐘,就真係幫南韓先開紀錄。

兩次貼中西班牙輸波

不過,我求大俠都知道,其實高路斯先係德國最強前鋒,結果佢上周六都後備入替就即刻建功啦,唔通我都係新一代保羅?梗係冇咁簡單啦,李榮杓已經估中多場分組賽嘅最終比數,當中包括荷蘭5:1大勝西班牙、意大利2:1贏英格蘭、科特迪瓦2:1擊敗日本、仲有智利2:0贏西班牙,令狂牛提早出局嗰場。
李榮杓就好謙咁話,估中咁多場都係因為好彩啫。有球迷就幫佢改個花名叫「八爪魚」,擺明就係話佢似保羅。不過,我求大俠就點都覺得,李榮杓勁過保羅囉。可惜我睇唔到南韓電視台,又唔識韓文,如果唔係就發達喇!

識睇 一定睇蘋果嘅足動世盃:
http://worldcup2014.appledaily.com/

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載