› 選擇地區
三藩市
紐約
洛杉磯
其他美國地區
香港 台灣 北美
 
2014年06月23日

和勝和負:戀養母情意結 - 梁栢堅

英軍每次出戰世界盃,都會牽動港人情緒。

執筆時英格蘭剛輸畀烏龜,但意大利同哥斯達黎加又未打,但只要「意哥和約」,英軍一定冚硬國旗,一眾英倫孝子勢必網上哭喪。情意結,係佢哋嘅解釋,但我從來覺得係最唔合理嘅解釋。
對英格蘭有情意結,似乎係九七回歸後五屆世界盃嘅指定對白。九八年、○二年,香港啱啱告別養母我唔怪你,你知啦,呢個世界即時轉軚,係好講天份嘅。好喇,到今屆回歸十七年,一眾明暗奀星仲係着住英格蘭波衫講「情意結」,大家感覺非常良好,而條街有人舉龍獅旗,就大把人鬧(着波衫同鬧人仲要隨時係同一班人)。我完全處理唔到呢種落差,唯一類似,係我哋嘅土共書記都係叫「震英」,而佢嘅行為係「振中」嘅。
有日,當有球迷着住英格蘭波衫,星期日路經維園而被亞伯圍住大叫「漢奸走狗賣國賊」,你唔好嬲,因為香港是中國的,鬼叫你係平民。同時間林鄭老公係英籍、「震英」仔女有英籍並留學定居,你又唔可以懷疑佢哋嘅愛國成份,係囉,人哋係對「公民身份」有情意結嘅。
如果大家都有情意結,其實可以公平啲,將全部郵筒髹番紅色、龍獅旗任掛、兩國國歌任播。但我自己對英國最大情意結係「法治、廉潔、開放、自由」,所以我都會對攞住件白衫嘅戀母狂作出聲援,大家一齊做港英餘孽,下次睇波舞龍獅旗。
文:梁柏堅

識睇 一定睇蘋果嘅足動世盃:
http://worldcup2014.appledaily.com/

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載