蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月03日
馬上成為壹會員

森巴嘉年華:紅軍粉赴巴西撐謝四
台妹:世盃超棒

【踩入球場】

女生闖巴西睇世盃好危險?專業球迷邢瑄玶(Roxan)肯定冇呢個感覺。台妹Roxan係利物浦中文官網主編,目前喺上海利物浦足球俱樂部辦事處做嘢,早前就參加咗由德國啤酒商所舉辦嘅世界盃之旅,現場為最愛嘅英格蘭隊長謝拉特打氣;最後英軍零勝出局,Roxan都依然認為呢次世盃之旅畢生難忘,仲畀咗唔少睇波貼士女球迷㖭。
由98世界盃開始睇波嘅Roxan,今次有機會去巴西幫英軍打氣,之前開心到幾晚都瞓唔着。今次旅程有人「包起」,Roxan就話除咗風褸應付溫差同埋冷風,同博主場球迷好感嘅黃衫外,冇乜嘢要準備。只係要捱近30個鐘機程,同埋11個鐘嘅時差,終於喺上月18號飛抵巴西薩爾瓦多。一行人抵達時已經錯過咗英軍第一場點輸畀意大利。
由於旅程冇包波飛,心急如焚嘅Roxan第2日就同團友,齊齊搵酒吧睇英格蘭對烏拉圭;英軍喺亞洲地區好紅,不過去到巴西就爭得遠。

俾「蘇牙」K.O.最無奈

Roxan話當地人都係幫烏拉圭打氣,原因竟然係大家都講西班牙話!而佢同團友落足力打氣,希望謝四嘅世盃路可以走遠啲,可惜世事豈能盡如人意,竟然俾「蘇牙」(蘇亞雷斯喺中台嘅綽號)以天神姿態K.O.咗。Roxan話一齊睇波嘅英國人都對隊波冇期待,話呢隻「三貓軍團」要多幾年先成熟。Roxan補充,巴西餐廳多數食肉,睇波時邊睇邊食,一晚食嘅幾乎等於一個月份量,女仔嚟到記住忍口!

忍住眼淚再撲飛

第3日Roxan已經冇乜心機,再次去到酒吧睇意大利對哥斯達黎加。英軍當時形勢危急,要意大利贏波先有一線生機。可惜最後哥斯達黎加贏埋,之後嘅事大家都知道啦。心碎嘅Roxan忍住眼淚,同團友去埋最後一站,包車去新水源球場搵飛,睇法國鬥瑞士。Roxan提大家冇飛唔緊要,因為街頭好多人兜售唔同場次嘅門票,結果佢哋一行6人格晒價,就用50歐元一張飛嘅價錢入手,幾抵玩。
可能上天見Roxan嘅英軍冇希望,就畀佢睇番呢場世盃暫時最多波入嘅比賽,最後法國以5:2怒炒瑞士;Roxan賽後梗係大讚同係效力利記嘅馬馬度沙高,希望佢可以代謝四捧盃!Roxan最後補充,話今次世盃之旅只係一個星期,英格蘭最後又零勝出局,就連「蘇牙」亦因為咬人被罰停賽,不過世盃體驗係「超棒的」,仲話各位女生有機會一定要試!

識睇 一定睇蘋果嘅足動世盃:
http://worldcup2014.appledaily.com/

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載