蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月29日
馬上成為壹會員

求驗客手記:星仔成親群星到賀

着住傳統韓國服嘅朴智星同太太金敏智,絕對係郎才女貌。互聯網

恭喜!恭喜!已掛靴嘅南韓球星朴智星喺周日正式同美女主播女友金敏智拉埋天窗,而兩人仲喺周一以情侶裝現身仁川國際機場,飛往巴黎度蜜月,真係sweet到暈。由於星仔喺體壇地位十足,而另一半又係娛樂圈中人,所以佢哋嘅婚禮絕對星光熠熠,啱晒追星一族。

軒帥、艾拉幫手撒花瓣

有南韓國家隊「永遠的隊長」稱號嘅朴智星同前SBS電視台主播金敏智,喺周日於首爾華克山莊酒店舉行非公開婚禮,話就話非公開箒,但傳媒都一早收到風哺晒喺會場,而星仔都好識做,搵咗一間studio同佢哋拍攝整個婚禮過程同埋發相,包保冇得失傳媒。而喺婚宴度,星仔同太太真係好似做show咁做,淨係結婚禮服都換咗兩套,一套係西式,一套就梗係傳統韓國服啦!
由於33歲嘅星仔喺南韓體壇嘅地位數一數二,所以唔少體壇名人都有嚟飲佢呢餐,當中包括南韓名宿前鋒崔龍洙、黃善洪同埋安貞煥等,仲有前棒球名將朴贊浩,同埋游泳健將朴泰桓㖭!
當然,更加唔少得前南韓國家隊教練兼星仔嘅恩師軒迪克,喺一對新人步入會場時,佢老人家仲同星仔嘅前曼聯隊友艾拉齊齊向一對新人撒花瓣㖭!至於演藝界嘅賓客,就有演員李秉憲、金宣兒、美女主播朴素賢、歌手PSY同金興國等,完全滿足到唔同粉絲嘅需要。總之,今次出席婚宴嘅賓客就有250人咁多。

朴泰桓爆自己單身

唔知係咪受到呢個浪漫婚宴嘅影響,南韓泳壇靚仔嘅朴泰桓都話想搵星仔做媒人,介紹個女友佢識:「我同星哥喺2010年已經認識,聽到佢結婚,真係好戥佢開心,我祝佢哋白頭到老。我𠵱家仲未有女友,睇嚟我都係要搵星哥幫我物色一個。」
星仔周日結婚,周一就即刻同太太飛咗去巴黎度蜜月,由於據報佢會去英國讀有關足球嘅課程,所以佢同太太預計會喺倫敦生活,暫時唔會返南韓。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載