› 選擇地區
三藩市
紐約
洛杉磯
其他美國地區
香港 台灣 北美
 
2014年08月15日

體壇拾趣:退役?「港」吓啫!
李志豪復出鬥美斯

美斯訪港,魅力沒法擋!東方守衞李志豪上月先話退出香港隊,點知足總噚日公佈港足35人大軍初選名單,以備戰新加坡同應該有球王美斯壓陣嘅阿根廷,竟然又見到呢位31歲球星上榜。
咁啱噚日東方有友賽,佢哋贏黃大仙2:1之後,問番當事人先知,原來佢只係以個人名義隨口講,未正式入信足總申請退隊㗎。

港足未來兩個月有3場國際友誼賽,主客兩對新加坡之餘,重頭戲仲有賀足總成立百周年嘅賽事,10月14號喺香港大球場迎戰應屆世盃亞軍阿根廷。
足總噚日公佈港足備戰呢3場友賽,同之後東亞盃外圍賽第2圈賽事嘅初選名單,除咗徵召番聶凌峰、科夫、高梵同方栢倫呢4位外流兵外,最爆嘅係竟然仲有東方嘅李志豪!猶記得志豪上個月喺中超北京國安回巢嘅時候講過:「踢咗港隊十幾年,係時候退位畀其他年輕球員接班。」咁點解𠵱家又會榜上有名呢?唔通足總擺烏龍?

Kim sir要求幫吓手

志豪噚日代表東方喺蒲崗村公園球場雨戰「升班馬」黃大仙後解釋,原來「退役」只係一場美麗嘅誤會︰「我之前係話我咁嘅年紀,都唔踢得幾多年,最好畀多啲𡃁仔踢,吸收吓經驗,但冇正式入信足總退隊。嗰次講完之後,阿Kim(港隊教練金判坤)都有搵過我,佢話港隊年輕球員唔夠國際賽經驗,想我幫手。我仲好有鬥心,惟有應承佢啦,作為職業球員,佢選得我亦一定會交足貨!」

「踢到冇心踢波為止」

事實上,可以同阿根廷球王美斯同場較技,真係聽到都覺得興奮,但志豪講明就算今次入到決選名單,都唔會係自己最後一場,「仲有大把國際賽,希望可以踢到冇心踢波為止。」
講番場友賽,東方憑羅志焜頭槌先開紀錄,加上梁子駿完場前射入12碼,以2:1擊敗有借將劉浩霖一度扳平嘅黃大仙。完場後,球隊仲預備好蛋糕賀同一日生日嘅副總監歐偉倫同教練高尼路。
不過,班東方球員似乎唔敢得罪金毛倫,反而高教練就可以玩吓佢,睇到佢哋向高尼路又淋水又請佢塊面食蛋糕,上上下下打成一片,真係生日快樂!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載