蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年08月15日
馬上成為壹會員

咖喱牛腩:不可思議的楊格 - 咖喱

喺球壇,呢個夏天都發生咗唔少不可思議嘅事,例如蘇亞雷斯喺世盃咬人,巴西竟然喺地頭俾人炒7:1等。不過,如果問曼聯迷咩事最不可思議,相信唔少人會答:艾舒利楊格鹹魚翻生。
近兩年,楊格俾球迷插到上天花頂。佢作為翼鋒,唔識扭波,永遠都淨係識喺左路推大位,俾對手睇通晒;就算難得畀佢出到波或者射到波,多數都係直接出底線。當雲高爾嚟到曼聯後,曼聯迷唔係擔心楊格冇表現,而係擔心冇球會肯買佢。點知,雲高爾喺熱身賽轉踢3-4-1-2陣式,楊格竟然如魚得水,由邊緣人變成主力。小弟認為楊格一直冇變,變嘅係戰術要求。上季莫耶斯嘅戰術好靠兩翼嘅個人能力去突破落底,然後傳中,令到楊格盤扭差嘅弱點暴露出嚟。
雲高爾講求球員之間多走位配合,楊格上腳機會減少,加強跑動。楊格本身無波跑動唔錯,佢踢維拉嗰陣,最叻就係喺前場不斷跑,接應長傳打反擊。楊格踢翼衞的話,佢唔需要控住個波正面扭人,而係有更多空間畀佢跑上去做助攻,加上翼衞唔應該壓得太前,K角位出波好過落底線,啱晒楊格啲習慣。因此,楊格有翻生之勢,唔係佢突然開竅,而係雲高爾套踢法咁啱適合佢發揮,又睇吓聽日對史雲斯佢有冇機會正選? 文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載