› 選擇地區
三藩市
紐約
洛杉磯
其他美國地區
香港 台灣 北美
 
2014年08月15日

咖喱牛腩:朗奴高文中伏鳥 - 牽牛

以往踢得好又教得好嘅例子唔多,不過呢幾年哥迪奧拿、安察洛堤、迪甘斯,都叫做踢得又教得,AC米蘭新任教練恩沙基亦都引人期待。有一定資歷球迷,都記得荷蘭重炮手朗奴高文,當年喺國家隊或者巴塞隆拿,都成日射入炮彈式罰球,踢中堅又夠硬淨,之前教阿積士同燕豪芬都贏過荷甲冠軍,不過今次登陸英超教修咸頓,就真係中晒伏。
修咸頓上季都係英超悅目足球嘅代表,列基林拔、拉爾拉拿同積洛迪古斯三叉戟踢到嘩嘩聲,不過嘉菲蓮娜(Katharina Liebherr)接替老竇做班主,上任後講到明唔識足球;原本唔識波都唔緊要,淨係識錢先慘,修頓今夏轉會市場活躍程度拍得住曼聯呢啲豪門,不過唔係買入而係賣出,賣出勞基梳爾、拉爾拉拿、洛夫雲等等,執到過億鎊,如果唔係積洛迪古斯長傷,睇個勢都仲會賣埋佢。
有出自然有入,人人都知朗奴高文要擴軍,又有子彈喺手,佢簽到兩位荷甲兵杜辛泰迪治同加斯安奴柏利,都算價錢合理,最搞笑係球隊本身已經有唔錯嘅門將保路錫,仲要使多1,000萬鎊買費沙科士打返嚟,又用1,200萬鎊收購侯城前鋒沙恩朗,真係水魚價。修頓開「咧」首戰就作客利物浦,如果紅軍由列基林拔、洛夫雲等舊將入波全取3分,高文肯定feel到英超領隊唔易做。文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載