› 選擇地區
三藩市
紐約
洛杉磯
其他美國地區
香港 台灣 北美
 
2014年08月26日

求驗客手記:巴塞護黑貓 球迷救伊巴
西甲好人好事

早排港鐵上水站發生直通車輾斃唐狗,唔少愛護動物人士都批評港鐵公司草菅小生命,睇嚟港鐵職員就要效法吓巴塞隆拿;巴塞周日西甲主場首戰,就出現不速之客小黑貓,比賽因此停頓幾分鐘,等小黑貓跑出球場先抱走佢,冇令佢受傷。好人好事嘅巴塞當然有回報,憑住美斯梅開二度,以3:0輕取艾爾切。

黑貓玩轉魯營

始終巴塞首戰對艾爾切,戲碼唔算強,可容納接近10萬人嘅魯營,只有約68,000人入座。比賽初段,球場除咗兩軍22人同埋球證外,仲多咗隻小黑貓衝入場,搞到賽事停頓。巴塞當然唔怕暫停比賽要罰錢,冇監粗打死隻貓,或者派鏟草車輾斃小黑貓,反而馬斯真蘭奴同碧基夾手夾腳趕隻貓出場,再由職員抱走隻貓㖭;事件擾攘幾分鐘再開番波,球迷亦都好似香港人咁包容,唔會投訴。有心水清球迷仲發覺,呢隻小黑貓同兩年前衝入球場嗰隻好似,唔通係同一隻貓再嚟捧巴塞場?
巴塞咁有愛心,當然亦都有好報,就算有尼馬、蘇亞雷斯缺陣,美斯一人已經夠殺,上下半場各建一功,加上小將蒙尼亞艾哈達迪繼甘柏盃後再有進賬,無懼馬斯真蘭奴上半場紅牌被逐,主場3:0大勝艾爾切,教練安歷基首次領巴塞出師西甲就全取3分。安歷基賽後就講:「今晚對巴塞球迷係一個滿意嘅夜晚,少打一人令我哋好困難,好在攻擊球員出色嘅演出,減輕後防負擔。」

伊巴開齋答謝中國球迷

原來好人好事仲有中國球迷,話說上季西乙冠軍伊巴,因為球會資本不合西班牙足協要求,幾乎冇得升班。暑假佢哋就作出全球招募入股計劃,以50歐元一股吸引球迷支持,結果順利集資成功,其中中國球迷更係全球集資第2高國家,周日伊巴主場對皇家蘇斯達一戰,場邊廣告牌就特別打出多謝中國球迷入股嘅中文字樣,而伊巴球員亦都眾志成城,憑查維亞拿拉一箭定江山,以1:0勝出,取得創會以嚟首場西甲勝仗。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載