› 選擇地區
三藩市
紐約
洛杉磯
其他美國地區
香港 台灣 北美
 
2014年09月21日

Sunday Fever:曼市雙雄如何留得住 - 梁栢堅

今晚曼城對車仔,注目度媲美埃風熄匙,皆因兩軍於今周歐聯皆似未瞓身,莫非留力打真軍?
先講曼城,作客對拜仁,一開場未夠1分鐘差啲出事,已預告此乃苦戰一場。曼城亦有還拖反攻,但拜仁火力實在太猛,大家都等睇客隊幾時出事,幸得門將赫特(圖)頂得住吓,下半場75分鐘湯馬士梅拿都要無功而還被換,洛賓入閘仲唔出事?眼見和波在即,89分鐘竟然被謝路美保定一抽,省中人改變角度射入,難怪赫特完場後即時喊出嚟,陰公豬。
隔籬車仔亦唔太爭氣,摩帥小變陣,晨早1球在手,對住唔齊腳嘅史浩克04竟然無力入保險球,聽到波台旁述牙痛咁聲,直覺唔太對路,結果真係逼和。呢場迪亞高哥斯達乃後備,下半場只入閘過兩刀,如果正選效果一定改寫。
有睇以上兩場者,今晚一定睇埋下半集《雙藍復仇記》:曼城經拜仁一辱,應該守力更強,車仔以英超不死身,配迪亞高哥斯達正選,睇怕入球「大」冇走雞,甚至每邊兩球和局都似。同時間我一定會贒吓愛華頓對水晶宮,事關愛記近來幾勇,殺得吓人,「大」值博。至於早場曼聯對李斯特城,人腳齊戰意高,勢必延續上回威勢,又係「大」格,有興趣過三關者祝君好運。
另外,歐聯當晚羅馬大勝莫斯科中央陸軍,今晚意甲對卡利亞里,乃完美參考。
梁栢堅
填詞人+彩池人

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載