› 選擇地區
三藩市
紐約
洛杉磯
其他美國地區
香港 台灣 北美
 
2014年09月29日

求驗客手記:費Sir魔迷齊發功
勸C朗回家

基斯坦奴朗拿度(C朗)又發威,呢位皇家馬德里球星喺上周六西甲又入波,連續5場建功下助皇馬以2:0作客贏維拉利爾。C朗咁勁,佢之前效力過嘅曼聯就更加想佢返去;喺嗰場比賽有球迷自費揸飛機拖住「C朗回家」橫額喺球場上空飛過;亦有傳聞話費格遜喺日前親自打電話畀C朗,落嘴頭勸佢回家。

2:0挫潛艇又有波入

皇馬近況回勇,上周六聯賽有門將卡斯拿斯復任正選,藉莫迪歷同C朗喺上半場各入一球,以2:0擊敗維拉利爾,喺西甲已經連贏3場。C朗自從傷癒復出後腳風勁順,自9月中主場輸畀馬德里體育會場波開始,至今5場比賽場場有波入,短短兩星期加埋已經入咗10球,你話紅魔球迷點會唔恨佢返嚟奧脫福吖。
喺對維拉利爾場波踢咗10幾分鐘嘅時候,情歌球場上空突然出現咗一條字,原來係架飛機拖住一大幅橫額飛過,上面寫住「COME HOME RONALDO--UNITED REEL(C朗回家,曼聯球迷上)」據講呢個行動係一個曼聯球迷組織花咗4,000歐元包機搞嘅,發言人格蘭迪治話:「我哋喺世界各地都有好多好活躍嘅支持者,大家都因為對基斯坦奴有愛而團結一心,會一路團結一致唔放棄,直到將C朗帶返屋企。」

傳費Sir打電話畀C朗

不過球迷嘅舉動,似乎唔可以即時傳達俾C朗,電視台影住後者,但佢一直專心比賽冇望過上空。另外,據聞前曼聯領隊費格遜都好想C朗返曼聯,甚至已經打過電話畀佢探下口風。傳媒引述一位足球經理人加拿度話:「C朗喺周三收到費Sir嘅電話,雖然前者喺皇馬過得好開心,但轉會能唔能夠成事,好大程度係取決於佢經理人文迪斯嘅取態。」話說曼聯要重簽C朗,轉會費加埋人工總數隨時高達1.4億鎊,當中唔少會係佣金,所以話被視為吸血鬼嘅文迪斯,點會唔想C朗轉會成真呢。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載