› 選擇地區
三藩市
紐約
洛杉磯
其他美國地區
香港 台灣 北美
 
2014年10月03日

咖喱牛腩︰再見「三角戀」 - 咖喱

法卡奧(左二)離開波圖時,馬德里體育會只是購買了其45%擁有權。

逢周五,咖喱牛腩都會跟大家暢談球壇的人和事。既會嘻笑怒罵,寫出激情,亦會冷靜分析,寫出理性。

國際足協主席白禮達上星期宣佈,將會嚴禁第3方擁有權。咩係第3方擁有權?就係指除球會外,仲有體育投資公司擁有一個球員,呢個情況喺南美、葡萄牙同西班牙都好普遍。唔少外國傳媒同球迷都大讚白禮達嘅決定,因為呢啲投資公司純粹為搵錢而要球員轉會,令球會角色被動,有時不得不賣人。
不過,一個制度是好是壞,在乎角度。據統計,𠵱家西甲至少有20名球員涉及第3方擁有權,其中拉科魯尼亞有5位,馬德里體育會亦有4人。呢個制度幫到中型班增兵,因為佢哋買球員唔使出晒全筆轉會費,可以搵投資公司分擔。葡超嘅波圖等都係第3方擁有權嘅受益者,佢哋可以用低價買入好多有潛質嘅南美新星。
最具代表性嘅第3方擁有權交易應該係法卡奧。佢喺波圖期間,波圖只係擁有法卡奧嘅45%權益。當轉去馬體會時,轉會費4,000萬歐元,但馬體會其實只係畀咗1,800萬歐元,因為馬體會只係買咗波圖嗰45%,而餘下55%都係投資公司擁有。1,800萬歐元就買到個威震歐洲嘅神鋒嚟用,真係抵!未來國際足協禁止第3方擁有權,相信波圖同馬體會等增兵時,會有唔少影響。文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載