› 選擇地區
三藩市
紐約
洛杉磯
其他美國地區
香港 台灣 北美
 
2014年10月06日

求驗客手記︰怕搞事請專人𥄫實
紅軍隔離巴神

利物浦前鋒巴洛迪利最近喺球場好失意,但喺情場上仍然非常得意,每隔幾日就會有拖新女或者夜蒲新聞流出。縱橫歐洲多年,而且無論係咩類型嘅女仔,對巴神嚟講易食指數都係高達5粒星。可惜巴神雖然識食,但佢拍拖都分分鐘俾人跟到實,因為據報紅軍怕佢搞事,所以請咗專人贒實佢。
巴神嘅經理人之前實牙實齒話利物浦張約唔存在「守行為條款」,但由於巴神「犯案」纍纍,據英格蘭傳媒報道,利物浦會方驚巴神會再生事,𠵱家派咗位專人全天候貼身跟住佢,駐紮喺佢座豪宅,仲誇張到連集體坐隊巴都要黐到實,坐埋喺隔籬㖭。呢鋪巴神就真正感受到紅軍會歌「你永遠不會獨行」嘅精神喇。

再次落選意軍國腳

加盟利物浦之後,巴神踢咗7場波但只係入得嗰1球,表現同佢嘅1,600萬鎊身價完全唔成正比。上周六主場贏西布朗場波,巴神個正選位就讓咗畀列基林拔,只係喺下半場後備上陣,亦冇咩建樹。領隊羅渣士就話,覺得巴神唔夠fit所以就要收起佢。
唔知真係咁啱得咁橋,定係大家夾埋玩巴神,送咗個雙重打擊畀佢。就喺巴神忽然俾羅渣士打入冷宮做後備嘅同日,意大利教頭干地就公佈咗歐洲國家盃外圍賽對阿塞拜彊同馬耳他嘅大軍名單,但巴神竟然再一次榜上無名。干地大膽決定繼續棄用呢位冇態嘅麻煩友,取而代之嘅人選就係同樣踢英超、今季喺修咸頓打到曉飛嘅加斯安奴柏利。

浪子被傳翻撻舊菜

球場失意,好彩巴神情場得意!前排先俾一齊打過「友誼波」嘅紅軍女球迷爆料,話巴神相信床戰係提升球場表現嘅最有效方法,佢啱啱就又俾人出賣,爆佢翻撻效力曼城時嘅舊愛、《花花公子》模特兒塔比(Tabby Brown)。雖然巴神當年不忠所以俾Tabby飛,但據講巴神對對方念念不忘,所以𠵱家有心有力有機會就即刻去馬,成功重修舊好。我求大俠就希望重新得到愛情滋潤嘅巴神,嚟緊嘅演出會有改善啦,不過唔知佢同塔比做啲私人嘢,紅軍位專人會唔會黐到實呢。

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載