› 選擇地區
三藩市
紐約
洛杉磯
其他美國地區
香港 台灣 北美
 
2014年11月26日

被靚女電到暈陀陀
雷神好得戚忘記風度

呢日(25日)最矚目就係雷神莫雷拉,在晨課時有位外籍年輕美女陪伴左右,但就唔係雷神老婆,不過大家唔好難亂諗,嗰位美女原來只係雷神同鄉巴西記者,特登來香港訪問雷神,拍攝佢嘅策騎生活,了解一下呢位騎師榜一哥嘅馬場雄風。
呢位洋妞都算能幹,完全無人幫手,整個攝隊伍只得佢一條友,要做埋cameraman,成朝跟住雷神喺馬場走來走去,真係我見猶憐。雷神有美相伴,自己又做埋拍攝主角,都唔知幾風騷,洋妞跟佢入馬房時,雷神忍唔住笑出嚟,個樣好得戚,反映佢好enjoy,不過有樣嘢要批評雷神,就係佢似乎冇乜風度,女記者揸住重型拍攝器材,行一大段路入馬房,雷神都冇幫手拎吓,又唔係叫你挽鞋,雷神兩手揈揈,似乎唔係咁好喎!
講番周三晚(26日)賽事,雷神座騎多且惡,其中第四場「金威勝」上仗用何澤堯跑四班賽,對手太強輸咗,今次返回五班,隻馬上季配雷神兩勝五班賽,人馬夠晒合拍,加上今場抽二檔好位,唔知屆時森巴女記者,會唔會入場拍低雷神嘅贏馬雄風呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載