› 選擇地區
三藩市
紐約
洛杉磯
其他美國地區
香港 台灣 北美
 
2014年12月01日

求驗客手記:皇馬輕締16連勝
艾斯高兩黃成污點

艾斯高(左三)不幸喺尾段做咗紅牌阿姑,對佢爭位絕對唔係好事,唔知點解佢仲笑得出?互聯網

皇家馬德里上周六西甲又贏一場,作客以2:1搞掂實力唔差嘅馬拉加,繼續喺榜首領先之餘,更締造咗球會史上首次喺各項賽事取得16連勝嘅紀錄。
咁值得慶祝嘅時刻,大家或以為兩個入球當中,點都會有C朗份啩?佢今季聯賽除對皇蘇嗰場冇上陣,其他有份上陣嗰11場全部有波入,點知呢項偉大嘅入球紀錄,就喺呢場斷咗纜,今場只係交咗兩個助攻。
如果要我求大俠好似睇戲咁揀場波真正嘅主角,我會揀加里夫巴利,唔單止因為佢入番球波,反擊最近傳媒對佢嘅批評,仲加上同佢爭位嘅艾斯高今場被逐,變相令佢個位置變得更穩。

C朗入球終於斷纜

先講番場波,皇馬今仗18分鐘已由賓施馬接應C朗左路傳送射入,但之後戰況膠着,踢到83分鐘,皇馬先再靠突擊,由巴利接應C朗頭槌二傳,殺入禁區射入;領先兩球後,皇馬竟有艾斯高兩黃一紅被逐,馬拉加就趁踢多1個人嘅優勢,由辛達告魯斯破蛋,最後僅負1:2,所以話巴利個入波都幾關鍵。加上近排佢成日受到傳媒針對,話佢狀態冇去季咁弗,好似上周三對巴素利嗰場歐聯,就被人發現佢嘅傳球次數只係多過門將基羅拿華斯兩次;而對馬拉加賽前,又有人將佢今季暫時嘅入球數字,同上季同期比較,發現比去季少咗3球。由於一直有報道話曼聯對佢未死心,所以西班牙傳媒就猜測,教練安察洛堤隨時會喺明年夏天將佢賣返去英超,然後提拔今季逐漸上位嘅艾斯高,但今場波,巴利就向呢班唱衰佢嘅傳媒做咗最好反擊。
其實巴利成場波都幾搶眼,有7次射門,更有兩次致命傳球,可惜隊友未能化為入球。而且,艾斯高今場被逐,衰啲講句,對巴利可能有好處。

艾斯高停賽益咗巴利

大家都知,皇馬嘅4-2-3-1陣式中,3個進攻中場除咗C朗冇得郁之外,另外嗰兩個位置就由佢、占士洛迪古斯同艾斯高3個輪流上陣,𠵱家艾斯高停賽,唔知佢之後仲攞唔攞得返個位,安察洛堤咁識𠱁老細,或者乘機唔用呢個人氣未夠嘅後生仔,咁巴利咪有着數囉!

識睇,一定係睇足英台【英波Live】:
http://soccer.appledaily.com
http://bit.ly/engballlive

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載